الرئيسية / مقالات / من خواطرى 2007 : حاله حب .. بقلم منى حسن

من خواطرى 2007 : حاله حب .. بقلم منى حسن

mona-haasan

ايه الحب! ايه هو الحب, جِه منين الحب, هى حاله ولا احساس تَكون تلقائياً..

وهل اصلا عرفت الحب وحبيت.. وايه الحب الحقيقى

هل واجَهت نفسك فـ يوم ان ما حبّيته حى! ولآ تناسيته ولآ اتنسَى او بقي ذكرى!

هل سألت نفسك إيه الاحساس اللى مُمكن تكون فيه دلوقتي او بعد كل السنين!

هل الانسان بيواجه نفسه بأحاسيسه القديمه ولا بيهرب منها او يتنساها او ينكرها مع العِلم ان هذا الحب اللي فات هو عاشه وفرح واتعذّب ومر بيه وفيه وكان جزء من حياته وعمره المحسوب عليه، واكيد علّم فيه واكيد اتعلّم منه بطريقه مباشرة او غير مباشرة ولازم ان يكون له أثر في نفسّيته وذاكرته وحياته. وان ماكانش لسه عايش فيه!

هل الحب منسى ولا موجود وبتتعايش معاه …

ايه شعور الواحد لما بيفتكر واحد مرّ في حياته كان في يوم من الايام حبيبه! الواضح ان رد الفعل واحساس كل واحد مُختلف عن التاني عند سماع الاسم او استرجاع موقف او مقابله بدون ميعاد بالصدفه يعنى…

هل مُمكن ان تعيش مع شخص وانت بتحبه وتكتشف انه وهم وهو في وادي آخر غير الحب!

هل يوجد حب اساساً ام انه لحظه وليده النظره او الموقف او العيشه مع انتهائها كل شئ ياخد مجراه الطبيعي!

هل حاله الحب اللى بتعيشها تقدر تلغى الحب الحقيقى اللى مالى كيانك ولا بتكون الحاله اكذوبه وقتيه لتتعايش بها مع الحياه!

هل الحب اساسى فى بناء العلاقه ولا الاحتياج اهم وتبتدى العلاقه ويتعايشوا كده!

هل الحب هو تجاذب روحى اولا , احساس ملئ بالحب وعطاء بدون مقابل بدون شروط وبرضه مبسوط, ملكوت غير, نظره غير, يمر الزمن عليه كأنه حالا لا يتغير ولا يتأثر يعتق زى النبيت ويسكر بهيامه فيه ويتقال انه عاشق وده الحب الحقيقى

وللاسف اعتقد ان الحال دلوقتى بقى مافيش آهات وسرحان وعيشه مع اغنيه زي زمان, الخلق ضاق و العقل تطّور مع القلب في حالة السرعه فى المعيشه اللى مش فاتحه اي مجال للبني آدم  بإن جزء العاطفه اللي جواه يتعامل بيه او أنه يرجع تاني يأخد حيّز من حياته,  مع العلم ان ده مُثمر لانها لحظات مُبدعه زي كل اللى كتب وألّف او رسم او صّور او غنّى عن الحب كل دول عاشوا اللحظه وعبروا عنها بالمعاناه وظروفها.

الايام دي لو حد سمع عن واحد حب يقولوا ياحرام او إتجوز البقاء لله, الاشياء الطبيعيه في حياه البني آدم حالها اتغير للأسف،  كل واحد بئي عايش علي هواه هوه  من غير اي اعتبار للآخر او شريكه..

كلمة بحبك لها قدسيه,  لكنها بقت كلمه دارجه بين الناس بتتقال زي صباح الخير وازيك,  فقدت معناها ومصداقيتها وده من ضمن التأثير المباشر علي التغيُّرات اللي تحدث وتحدثت للناس فى تعامُلهم مع بعض, حالة توهان عاطفي غالب عليه عاطفة المصلحه بمعني انت صاحبي وحبيبي علشان انا عاوز حاجه وإقلب! او بلاش أئلب, مع الوقت التقارب الوقتى هيتلاشى. واتنسى الحب اللى بجد

الحب المفروض انه فطرى

الحب هو حنيّه

الحب هو جمال البني آدم الداخلي

الحب هو اللي بيتحب ف الشخص الاخر

هو اللي بينجذب اليه اتنين بعد النظره الاولي

الحب هو الشعور بأنك معزول عن العالم في لحظه لا تري أي شئ غير حبيبك

الحب هو دئه قلب زياده وسريعه

الحب هو سباق مع الوقت وزعلي علي خسارته وانه بيعدّى

الحب هو وقفه واستراحه من جوه أوي بعد يوم مضغوط مع اللي بتحبه

الحب نظره تشَّبَع

الحب هو ابتسامه لمجرد ظهوره فى تفكيرك

الحب هو وجوده وهو لا وجود له

الحب هو اليد السحريه التى يمدها لتعيش…….

هل ممكن في زمن الحب بالانترنت والموبايل والساتلايت يكون فيه الاحاسيس دي كلها !!

ولا ماهي بقت دلوقت مافيهاش تعب ومعاناه, كلها مُبرّمجه و زرار…..

الحب هو اصلاً إحساس يؤثر تأثير كبير علي احاسيس الانسان وتعاملاته,  مين مش بيحب..

الحب له علامات, الحب الرومانسي وهو سرّحان واحلام مع اشتياق وابتسامه علي الوجه في حاله تفكير في حبيبه وحين ميعاد اللقاء خفقان في القلب وسرعه الدّق مع شويه ادرينالين يدوا شويه حيويه ونشاط وخفه داخليه غير طبيعيه ده غير الاحساس بالقوه والثقه في النفس, وعند اللقاء احساس التعامل والتَلامُس وانفصال عن واقع ان مفيش حد حوله كأن مفيش حد غيره.

الحب مختلف الاحاسيس مش بس حب كحب عاشقين, يوجد الاحساس بالحب للاصحاب, احساس كله افكار وانتماء وامان وده علي حسب الصُّحبه واكيد الحب للأب والام والاهل وخلافه.

بدايه الحياه حب بدايه  كل حاجه الحب لان لو حبيت حاتدى و تتعامل بامانه…

حب بجد, حب صادق نقى نابع من جوه حاتعيش احساس جميل وتبادله مع من حولك بعطاء واستفاضه, مردوده جميل اوى .. جرب

شاهد أيضاً

القاتل واحد وضحاياه كثيرون ! .. بقلم : عبدالرحمن مهابادي – محلل سياسي خبير في الشأن الايراني

إذا نظرنا إلى مشهد الشرق الأوسط والجرائم المرتكبة في هذه المنطقة من العالم ليس من ...