اليوم الإثنين 20 نوفمبر 2017 - 9:51 صباحًا
الرئيسية / مقالات / من خواطرى : من مصريه .. بقلم: منى حسن

من خواطرى : من مصريه .. بقلم: منى حسن

mona-haasan

اللى بيحصل صعب ومش مفاجئ بس علشان الشعب عاوز يعيش مابيحسبهاش لانه مابيعرفش يحسبها،

اتعود دايما على كل حاجه تجيله لحد عنده من اول ما يصحى من النوم قبل ماينطق صباح الخير كلمه كبايه الشاى تجيله فى سريره لحد مايرجع العشا متوضب له حتى مايقومش يشيل طبقه.

اه مابقولش انه مش مطحون علشان يعرف يعيش , بس مش زى طحنه الناس الكادحه بجد اللى بتنزل الساعه ٥ و ٦ الصبح تروح تشتغل بذمه وضمير لحد الساعه ٥ وترجع بيتها تطبخ وتوضب وتراعى اهلها, وصله حياه فيها انتاج فيها نظام فيها عطاء فى مقابلها فى راحه فى رخاء فى صحه وتعليم صح.

الحكومه حاتجيب منين وانت بتروح شغلك تضيع نص الوقت مابين اكل وكلام وصلاه والباقى بتعرقل شغل ومطالب الناس. ولا تروح وانت مش طايق نفسك ولا مبدء اهو شغلانه وخلاص.

ماهى قاعده تدفع لك كل حاجه علشان تعرف تعيش,  انت بقه بتعمل لها ايه!!! بتاخد وبس

وكمان مش عاجبك وزى العيال عمال تدبدب برجلك وتصرخ ومش عاجبك.

الحقيقه اضرب دماغك فى الحيط, لان انت السبب الاكبر فى اللى بيحصل ماحدش قالك خلف تلاته واربع وخمسه عيال وشيلى يا حكومه. ماحدش قالك انك عايش طول عمرك على سلف ودين علشان بس انت تعيش, وانت مش عاجبك وبتطالب كمان.

واللسته حاتطول لو بدءت فى نقدك يا شعب ومالوش لازمه لانه مش حايغير واقع  واحنا فى دلوقتى جه دورك تسكت وتستحمل وتدى البلد حقها من شغل لانتاج لنظام لنظافه لتقويم.. اتعلم , غير ثقافه تعاملاتك عيشتك غير طريقه عيشتك عيش على اد احتياجاتك وميزانيتك.

ساعد بلدك تعدى من فقر وقحط ومأساه بلد بتتحارب من كل اتجاه وللاسف بما فيهم شعبها..

ساعد ارضك اللى اوياك و متتعوضش ولا ببلاد الدنيا كلها.

ساعد نفسك الاول فى فكرك وحياتك وطريقتك واسلوبك مش عاوزه اقول انه كفايه ده ولكن هى بدايه… هى بدايه يا شعب

مش برمى الغلط كامل عليك, لأ .. كمان الحكومه بس ماهما كمان من الشعب قبل مايكونوا حكومه يعنى كمان هما لازم يقوموا نفسهم ويطوروها ويغيروا من نفسهم قبل ما يمسكوا مناصبهم للاحسن

شعبنا بكل ما هو فيه شعب جميل محتاج شويه ثقل فى عيارات اسلوب حياته سواء من احترام  ادب ضمير نظام كرامه التزام فهم عطاء شهامه وانتاج وحب بلده بجد. واحترام نفسه وبلده بجد

احنا فى اى محنه بنعيش ونتعامل ومش اول ولا اخر مره حانعدى فى محن لاننا بنكتر وعددنا بيزيد ومافيش كونترول لا من البشر ولا الحكومه .,  الحب زياده عندنا شويه

اللى جى صعب اوى واصعب على الحكومه  اللى يحاول لازم يحاول يعيش عيشه فيها موازنه لظروف مستواه,  كل واحد لازم يساعد ويلتزم بالموجود وهى كمان فرصه للتغير سواء للنفس او اسلوب المعيشه.

هى قرصه للتقويم والتهذيب ومراجعه نفس وعيشه,  ولو حسبتها صح كل واحد حايرجع لنفسه بدل البلونه اللى نفخها حوليه وعايش فيها وغيرت دمه وشكله وجلده واحترامه للاخر وحاول يعيش حياه مش بتاعته.

وفى الاخر انت حاتاكل وتعيش وتتنفس نفس الهوا اللى انت بتلوثه وتشرب الميه اللى انت برضه بتسممها وتملاها امراض وحاتعيش لانك الشعب.

وبعدين الشباب اللى فى كل حته مش عاوز يشتغل الا لو خد ماهيه ٣ اصفار يا مش جايبه همها. ده مبدءهم   عاوز تقولى تقوم بلد ازى على مبدء شباب مش عاوز يشتغل وبيشتكى من البطاله وهو رافض المبدء.

ولا لو اشتغل مش مهم لا يساعد نفسه ولا اهله المهم يشحن موبايله ويلبس ماركه. ايه الفكر ده

الحياه مليانه امثله سلبيه للاسف فامنين حاتيجى الايجابيه للنهوض بلبلد والحكومه متكفله بكل حاجه. ماهى فى الاخر حاتقع.

طبعا اللوم مش كله على الشعب بس, سوء الاداره كمان وزى ماقلت ماهما من الشعب. الشعب اللى محتاج “ريسايكلينج” اعاده تدوير من اول وجديد ببدايه صح وايجابيه.

فوقوا بقه كفايه وعيشوا عيشيتكوا يا شعب

مصريه

شاهد أيضاً

من خواطرى : كلام شباب .. بقلم: منى حسن

كنت قاعدة مع مجموعة شباب يعني فى حوالى تلاتينات .. عشرينات … كان واحد منهم, ...