الرئيسية / مقالات / من خواطرى : كلمة تايهه .. بقلم منى حسن

من خواطرى : كلمة تايهه .. بقلم منى حسن

mona-haasanمش عارفه ده سن ولا مسؤليه ولا احساس زياده ولا التزام ولا ايه بالضبط…
الخوف كلمه عمرى ماتعاملت بيها ومش عارفه ليه استعملتها دلوقتى, هوغالبا مش لاقيه كلمه تانيه اعبر بيها بحكم الكلام اللى بيطير من الدماغ,  وساعات او العادى فجاه تلاقيه جه فى ثانيه بعد الحدث…
فبالتالى حاستعملها و ابدلها بنقط لحد مالاقيها …..
الموضوع ان كل يوم فى حياة الانسان موجود جواه حزمه احداث فى حياته,  يا حاجات عايشها يا حاجات شايلها معاه من السنين يا حاجات مستجده ده غير مقصات حراميه الحياه.. كده حاندخل فى يوميه الحياه!!
لأ بلاش الحياه, لانها مظلومه معانا لانها بتدينا يوم جميل كل يوم علشان تبتديه وتعيشه وتوظفه بعشتك اللى انت مختاراحدثها معظم الوقت… الاقدار مالناش يد فيها وهو امر مسلم بيه.
الحياه هى اليوم وابوابه ومحطاته واحداثه, هى السما والارض هى النبض هى الروح  هى الليل والنهار هى الشمس والقمر هى النور, ولذا فهى اتظلمت بنقم البشر عليها, علما ان هيه افعالهم وتفاعلتهم اللى بتدور فيها حياتهم.
جزء مهم كل يوم بيزيد جوه الواحد,  خصوصا لو هو جزء من منظومه الحياه دى او صحيح الكلمه العيشه دى,  وانه مش عايش على هوامشها وانه وحساباته مع نفسه وحساباته لبكره تكون ناتج ايجابى بناء لعيشته فى وسط احمال الحياه.
حسابته مع نفسه هى تقويم وغربله احداث, منها التعامل والنتائج  بمردود والخبره والتعايش مع السلبيات وتحويلها لايجابيات.
اما حسابات بكره فدى داخل فيها كل نًفس حواليك بمعنى كل فرد بتتعامل معاه سواء بقى مادى او حسى او معنوى وده من اكتر القلق وعدم الامان اللى يعيشه البنى آدم لان هى دى المسؤليه.
واكتر شئ بيغرق فى التفكير والهموم, هى المسؤليه بابوابها والارتباط والانجاز, يعنى عاوز اعمل ايه او ازاى,  و العصر ده الحلول بقت محبطه ومرهقه وكله غرقان جواها!!
الكلمه اللى بدورعليها لسه مش لاقياها, سأله عليها من حولى ومنهم وصفوها  لكلمه خوف, رعب, قلق,احباط واخيرأتَوَجَّسُ والكلمه لسه تايهه منى,  بس معانيها كتير وشرحها يطول لانها هى ممكن مجموع كلمات كتيره اوى او بما معناها:  لو صحيت الصبح لاقيت حياتك اتبدلت, اوهى كل يوم بتلاقى وتسمع من قريب او بعيد عن حد مريض وجعه صعب ومكتف ومش عارف تعمله ايه غير انك تبقى قريب منه و قلقك اكتر من اللى جى, هى مستقبل عيله مش عارف تضمن لهم مستقبلهم من الضغوط المستمره من البلد, هى نزوله لمصلحه مش عارف راجع ولا لأ لقله الامان, هى اخ واخت وعيله تباعدوا لاسباب انها مشاغل, هى مناهده جوه وبره ولعبه يا كسبت يا خسرت,  هى سلوكيات تحورت بغيرمقبوله لا لروحنيات ولا لسياسه ولا للانسانيه,  هى مواضيع حيويه فى حياتك وايدك متكتفه لانها فى ايد ناس تانيه يا طلعت خير يا شريره,  هى نَفس حبيب على قلبك من خوفك عليه تقلق فى عز نومك لتتأكد انه بخير و عايش,  هى الامل والحلم بتحقيق افكارك, هى ناس اتألمت بدروس قاسيه وخرجت منها ورافضه التجربه والمواجهه, هى ناس اتعومت زى الجنيه واصلا لا ليها ولا بتعرف تعوم,  هى ناس عاوزه تاخد بس من غير ماتدى, لا لبلدها ولا اللى حواليهم,  هى ناس معنى مفهوم ثقافه مجتمع تايه عندهم من كتر لهيهم ورا متطلبات حياتهم, هى ناس هاممها الشكل وليس الجوهر وناس بتحاول تعيش, هى سلبى وايجابى و حلو وحش و سخريه لاذعه, هى يومك صاحي مش عارف حا تقابل ولاتسمع ولا حاتعيشه ازاى النهارده, هى شباب بتضيع فى شرب مخدرات وهو ده الهاى لايف وتقليد اعمى او حتى الـ لا مستوى,  هى دخول عالم الهوا ” الانترنت” والزراير ونسيان الحياه العمليه و خبره تعامل و مقابله للى فيها معنى وخبره حياه.
وهى عصر مافيش صبر ولا خلق لا لكبير ولا لصغير من كتر ما دخل جوه الشاشه إ ستسهال الردود بالايمو والصور خلى احساس انى ها!  انا لسه حارد بقى صعب… فالاسهل بدوسه لايك او صوره ضحكه او قلب ده لو بعشم…
هى دى الحياه و التعامل دلوقتى, حتى العزايم بقت مجرد دعوه او العزا كلمه على صفحه, واتنسى لمه الاهل والاحبه والاصحاب..
الاصول بتتبخر ولما اعاتب يتقال انتى قديمه اوى  وهو ده العصر..
اســـــفه اعترض على هذا العصر ومقاطعه الاسلوب والطريقه واتمسك واتشبث بما نشأت عليه وعشت بيه سواء فى مجتمعى وناسه واوناس كتــير غيره من بلاد غيرنا.
اسئله كتيره بتتحاور وتحاورت معها و جرعات احباط عاليا من محيط مجتمع, يسوء لحاله, سواء من فرد لعيله لجار للاصدقاء..
احنا حصلنا ايه!! ورايحين لفين
مش حاأ مِل من انى اقول واعترض واحاول…  ومافيش حاجه اسمها ده من وجهه نظرك انتى, لان الصح مافيش عليه اختلاف..
والدخول فى المنقاشات البيزنطيه لمجرد اثبات وجهات نظر بان مفهوم الصح عندك غير مفهوم الصح عندى,  فى نظرى دى مجادله عقيمه فيها هروب من الاعتراف بالقيم اللى بتتكسر لمواكبه عصر بارد من كتر الهوا فيه والزراير, وطبعا لازم يدخل فى الحوار الحريه والديمقراطيه اللى مش مفهومه صح,  و جدال جدال,,  سواء مع شباب او كمان مع من منِ جيلنا وتداخل بمفهوم هذا العصر,  علما فى الاخر انا مش ضد فى استعماله بدليل انت بتقرا مقالتى ولكن استعماله بإيجابيه وكاعامل مكمل ومش من الاساسيات ومش لالغاء انسانيتى واحساسى وعقلى وعواطفى و تواصلى الملموس,  ده غير انه بياكل الوقت و الفكر.. مانكرش ان له ايجابيات تانيه ولكن سلبياته مدمره وخصوصا فى تغير ثقافه وفكر.
الحقيقه احنا فى زمن صعب جدا, الوقت كمان عامل مهم فيه, الانجاز عامل مهم فيه, الانتاج عامل مهم فيه, تغير سلوكيات مطلوبه جدا,  تغير مبدء التقليد والتشبهه بثقافات مستورده لها اسببابها فى بلدها ماتليقش على مفهوم مجتمعنا وسبب اذيته.. قيس على كده حاجات كتيره اوى مفاتيحها موجوده .. ولكن مختفيه فى مكان ما!!
حاتعملوا ايه وحاتساعدوا ازاى!!
احنا معندناش غير نفسنا دلوقتى, عندنا العدد و القدرات و الاساسيات لانجاح اى مجتمع وبلد
مطلبى:  اعيش بآدميه وامان,  مبدئى ابتدى بنفسى واعمل اللى عليا و بطلب من كل اللى حواليا المحاوله, وفى ردود يعنى حابقى رملايه فى صحرا ولا بحر حاتعمل ايه!!!!
ايوه ماهى النقطه عملت البحر والرملايه بقت الصحرا… وهى دى البدايه
ماتتكلش على حد او تستنى.. ابدء بنفسك, حاول, تقدم.. اكيد حاتنجح او حاتتعلم حاجه جديده…كون ايجابى

اعمل واجبك ساعد وانتج وحافظ على نظافه بلدك وكن امين عليها.. حاتديك و ترجع لها الحياه
مصريه
2016

شاهد أيضاً

هل الموت وحيدا أمر سيئ ؟

في معظم الأحيان يموت الناس عندما يكونون وحدهم، وفي بعض الأحيان، توحي طريقة موتهم بأنهم ...