اليوم الخميس 23 نوفمبر 2017 - 9:40 صباحًا
الرئيسية / مقالات / من خواطرى : صباحَاتك .. بقلم : منى حسن

من خواطرى : صباحَاتك .. بقلم : منى حسن

اصطباحة الصبح جميله, بدايتها وهى طالعه  من القلب مع ابتسامه و وش بشوش.. يـــــاه !!

مين وَحشُه الأصطباحة دى, ولا مين بقى يصحي على كده,  ولا مين فاكر المعنى بجد للاصطباحه لسه, هى بقت كلمه تتقال أتوماتيك من غير ما حد يعنيها اهو واجب كلام, الصبح صباح الخير او الفل وبالليل مساء الخير او الجمال, علماً الجمال يُستمتع به فى اى وقت من اليوم

و لكن جايز اهو كله  و عالمه!!

اللي يقول يقول واللي شايف ان مساءه جمال يبقى حاجه كويسه, لان مافيش جمال دلوقتي اصلا لا صبح و لا ليل, فيه قُبح فيه تعاسه فيه غدر فيه اذى فيه كل حاجه نفسك و منفسكش فيها; لدرجة انك مش راح تحس ان فيه حاجه اصلاً, اهو ماشى وخلاص.. وحًاشه من الاخر.

هى كده دايره دواره مع صباح فيها:  جميل, خير, فل ولآ مساها و كده كده هى ماشيه,  بس اهم حاجه فيها البنى آدم ناطق و عايش هذه الصباحات.

على فكره الصباحه ناقصه واحده فى لغتنا.

الصبح بيقول صباح الخير والليل مساء الخير فين ما بين الظهر و العصر!!

ولآ دى فتره ايلوله فترة منسيه مش موجوده فى المُعاملات ولاّ محدش عرف وفكّر يلاقي لها كلمه زي يومك سعيد ويومك جميل ولاّ زي الفُل,  وده لان اليوم هو محور الحياه اللي يدور ويعمل ويتعايش فيه الناس.

حد راح يقوللي انتي فاضيه ولا ايه!  سيبتي كل حاجه ومش لاقيه حاجه غير انك تفكري في كلمه ما بين الصبح والمسا ولاّ اصلاً عملتى الصباحات حكايه ؟

ردّي .. تخيل آه … الصباح بدايته مؤثره على الواحد مع نفسه ومن اللي حوله ومع اللي حوله,  تخيل بداية صباح الخير  مكشره ولاّ بمدّ بوز معصور عليه ميت ليمونه إللي إلّة قولها احسن..  وتخيل راح تعمل فيك ايه ولاّ راح تستقبل حياتك فى اليوم ده ازاي!   راح تلاقى نَفسك قرفان, مقَريّف, عصبي ومش طايق نَفسك ولا غيرك,  طبعاً مش من الكلمه بس…

وفيه غيرها من الضغوط كمان ولكن الطلعه الاولى مع فتحة عينك وخروجك من بيتك  تكون بدايتها كده !

شوف بقى الفرق لصباح بوِش بشوش ولا بتتقالّ بَموده ولاّ ببسمه تلاقي نَفسك من جوه دب فيها نشاط وراحة نَفس وكميائياتك النفساويه تفاعلت مع الصباح الجميل وبدايته.

الصباحات مختلفه سواء من اهل البيت او الشارع ولآ الشغل,  كل واحده منهم له وقع عندك وبمعامله للآخر ولها مردود ورد تلقائى منك له.

كلمه وسط كلام كتير فى يومك بتعداد قولك, علماً انك تستعملها فى احتكاكاتك اليوميه بكثره وانت مش داري بيه.

مع الزمن والتطور لسّه الصباحات تجد طريقتها وسط الكلمات التى تبدلت و بقت هاي وازيّك على الصبح والمسا, ودول كلمات استعمالها بعد الصباحات, ومُمكن  فبداية حوار او الاطمئنان….. صباح المحبه و مساها

الصباحات هى وسيلة تواصل مع الآخر سواء بسلامه نيه ولاّ لأ,  مش لازم يكون فيها كلام  وحوار ولكن فيها اصول وادبيه وانسانيه فطريّه للتعامل… صباح المحبه و مساها

الصباحات زى السلامات زى المُعايدات كلها لها وقع نَفسي فى معاملة البني آدم لغيره وتخرج منه بتلقائيه ويتعامل فيه بالاحساس اللى وصل له, وياريت يكون حلو لانه لو سلبي حيأثر ويعلّم فيه مده طويله…. صباح المحبه ومساها

الصباحيات مرتبطه بالنور يا مولع يا مطفّي,  الوحيد اللي قادر ان يجعل حياته منيره هو البنى آدم بإنسانيته ونوره الداخلي الذى يشع و يعطي له طاقه وروح فى حياته وحياة الآخرين…..صباحات مباركه بلمسات محبه

ياترى صباحه جميل عفويته فيها ابتسامه, فيها عطاء منك لغيرك, علشان حياته تفرق معاه ومعاك … صباح المحبه ومساها

مصريه

صباحات مباركه لمسائك

2013

شاهد أيضاً

من خواطرى : كلام شباب .. بقلم: منى حسن

كنت قاعدة مع مجموعة شباب يعني فى حوالى تلاتينات .. عشرينات … كان واحد منهم, ...