اليوم الإثنين 11 ديسمبر 2017 - 1:25 مساءً
الرئيسية / مقالات / من خواطرى: روقان وزهزه .. بقلم : منى حسن

من خواطرى: روقان وزهزه .. بقلم : منى حسن

احلى حاجه فى الدنيا لما تصحى الصبح وتشوف خضره خضارها لونه صاحى معاك منعنش مغسول مزهزه مبسوط بخضاره والوانه ..
وسما صافيه زرقاءنها فيه رواقان  مغطيه بيه الدنيا اللى بتتمنى تعيش لحظه الروقان من كل قلبها, على شويه ساقعه مفرفشه تنعنش وجدانك وتحمس الطاقه اللى جواك بإيجابيه التفاعل مع نفسك واللى حواليك, وشوارع نظيفه مغسوله بتلمع تديك احساس بالانعزال عن حقيقه الواقع بعد ساعه ولا اتنين وحمى الشمس حاتخليك حاتصتدم بالواقع المرير ونرجع لنقطه كان نفسى جملتها تكمل لاخر العمر… واقول ايه النضافه دى!!
منظر فيه ابداع ربانى جميل متناسق الالوان فى تكوينها, تبعث الهدوء والراحه حتى مع بعتره التوزيع اللى بفعل الجناينيه برضه حلوه..
صحيح المنظر متكرر ماهو كتير عندنا شمس وسما صافيه وخضره بس مش كتير عندنا مطره كفايه انها تغسلها..
ولا الشوارع اللى فيها صرف صح,  واكيد كارثه للشوارع اللى بتغرق وتوقف حال الناس..
الناس اللى عامله زى الجو بمزاج ونوات وزعابيب وعادى..  ده غير ضغوط الحياه والشارع وضغوطه النفسانيه مع نفسه كلها مع بعض خلطه كونيه سحريه بيعيش ويتعايش مع بعضه بيها وفيها جوه التابلوه.
الصوره اوالتابلوه الربانى دى تايهه معانا فى ساعات الحياه اللى بنعيشها ونسعى ونشقى ونتخانق ونطمع ونخسر ناس ونحب ناس ونكسب ناس ولآ قوه ولا منصب على حساب بعض .. و ممكن لبعض اكيد فى حاجات كويسه بس هى فى الاخر ساعات وتلخيصها لحظه!
مش سلبيه خالص ولا تشاؤمية اطلاقا ولكنى دايما واقعيه وايجابيه عمليه لان مش معنى غربله الحياه يكون معناها ان حياتى تتحدد فى تعاملات او ظروف او احداث,  بالعكس لان الحياه هى رحله دسمه مليانه جداً  ودروسها كتيره وده من احد اسباب وجودك فلازم توظف نفسك فى حياتك صح وتحول السلبيات اللى بتقابلك لايجابيات علشان تشوف وتحس بتفاصيل كتيره السلبيات بتلغيها وتوه عنك وتنناساها فى زحام رحلتك واول ماتنتبه لها تلقى ان وقتها اتأخر!!
صحيح الشمس حاتطلع كل يوم بيك او من غيرك لاخر الزمان بس وجودك يفرق فى يومك ومن حولك.. وان يكون جميل سيبان بصمتك فيها يكون له ايجابيات..
من الايام الجميله ان تلاقى كلام كله حب وامل واحساس جميل موصول بوجود من يكن لك هذا الحب والود سواء كان من قريب او بعيد ولما تفكر تلاقى ازاى ممكن يومك وحياتك وكيانك مايكونش عَطاء, وانت غنى بمن يمدك بالاحساس ده وهم سندك والاحساس الصامت المستتر اللى بيقويك بالامان وبيحسسك بوجودك ويملى كيانك ويدفعك للعطاء للعمل والتعامل والتفاعل مع الحياه  والعيشه,,
والايام دى واضح ان الناس عاوزه تفرح وتحب وتتمنى لانها تعبت من ايام وسنين صعبه مليانه حزن وضغوط وهى ناس طبعها فرفوش اصلا واصحاب نكته وضحكه,  فبيتعلقوا بمناسبه ويخلقوا موقف علشان يسترجعوا تانى نفسهم ويقدروا يكملوا مشوار الضغوط اللى عاشين فيها..
اومال لو عشنا الجمال والنضافه كده كل يوم وزاد عليه مرور ونظام وعربيات والتزام وجمال معمار وثقافه فكر وعين وسلوكيات بادب واحترام من صدمه حلاوه العيشه و راحه البال دى حايجرالنا ايه:  لخبطه وعدم توازن او سكته جماعيه فى الغالب..
احساس فيه جمال فيه راحه بال وفيه هدوء ولكنه هنا لحظى و وقتى بس علشان شويه مطره غسلت شجر وشوارع وتانى يوم سما صافيه  بنضافه شجر..
الخضره لسه نضره والهوا ساقع والشوارع ضى الشمس عليها كانها مسقيه فضه ونقط المطره بينفضها ورق الشجر وضحك الولاد بيلعبوا فى وسط النجيله المبلوله لا همهم بلل ولا ام بعقاب ساعه المرواح مليانين براءه ومرح ..
نضافه  سلوكيات  ثقافه
امنيه مصريه
2017

شاهد أيضاً

من خواطرى :  حدادِك يا مصر.. بقلم : منى  حسن

من بُعد سمعت اخبارك يا مصر, ماعرفتش امسك نفسى ودموعى ولاقيتها نازله كأنها شلال مش ...