اليوم الجمعة 24 نوفمبر 2017 - 7:46 صباحًا
الرئيسية / مقالات / من خواطرى : مصر جميله .. بقلم : منى حسن

من خواطرى : مصر جميله .. بقلم : منى حسن


على فكرة لسه مصممة ان إحنا حالنا وبلدنا احسن من حال ناس كتيرة أوي, بلدنا حلوة وجميلة أوي أوي وكل مادا ما باقتنع باللي أنا بأقوله .. وإحتكاكي بره وإحتكاكي بالناس بيثبت لي بإن اللي بأقوله هو ده صح ..
إحنا عاوزين ثقافة وعايزين إمكانيات وعايزين توجيهات بناءة إيجابية .. وأهم من ده كله إحنا عايزين التزام.. وأكيد معاه نضافة وأمانه .. أمانه في الأداء وأمانه في العطاء وامانه في كل حاجة .. النضافة والالتزام من مفاتيح نهوضنا للإيجابية في بلدنا ..النظام مهم جدا ..
لو عملنا كده يبقى أكتملت حاجات كتير اوي فينا وفي المنظومة بتاعتنا, وهى اضافات اصلها موجود بس هو عدم مبالاه واستسهال وايوه عندنا مشاكل كتيرة أوي أوي ولو اتحلت بالطرق دي ولو على مراحل حتبقى احسن بلد في الدنيا.
اقتناعي بيزيد في كل مره بأخرج فيها بره بلدنا .. ناسنا ما تتعوضش .. طريقتنا ما تتعوضش .. اهل بلدنا فيهم حاجة مش موجودة في الدنيا كلها .. بس وماعندهمش حاجات موجوده فى الدنيا كلها .. اللى مابفهموش انهم بيتعاملوا بيها عادى بره بلدنا لأنهم مجبورين جايز وده شئ مش كويس لإن البني آدم لازم يعمل ده لوحده من غير إجبار
ويكتسبه ويتعلموه إذا كان معندوش أو ما يعرفوش.. ما يقلدش لازم يتعلم علشان التقليد ما بيكونش بصدق إنما التعليم بيبين إيه هو الصح من الغلط ومشكلتنا إن إحنا بقينا بنقلد بس من غير ما نفهم .. من غير ما نفهم تاريخ التقليد ده لإيه أو كان سببه ايه أو كان بيوصل لإيه أو كان يهدف لإيه .. إحنا حياتنا اتشقلبت كلها من الشمال لليمين بسبب إن هي فيها تقليد جامد جداً وكان تيار مسبب لتغيير عاداتنا وتقاليدنا وتغيير فكر الشباب.. ومش بس الشباب لإن دخلت تيارات تانية كتير أوي وبقالها سنين وسنين وسنين بتتوغل جوانا بشويش خالص.. مكنش فيه ادراك ووعي إن ده بيحصل علشان خاطر يغيرنا ويغير أصولنا وجدور عاداتنا وتقاليدنا وأصل كلامنا.. فاللاسف الدنيا مش ماشية بالطريقة اللي الواحد يتخيل ان هى المفروض تكون.
الواضح دلوقتي ان الناس كلها عاوزة تتغير بس لازم يبقى فيه علامة للتغيير يبتدوا منها.. لازم يبقى فيه نقطة يبتدوا منها لإن غير كده مش حيقدروا يعملوا أي نوع من الإيجابية في التغيير .. إحنا إتغيرنا في أقل من 15 سنة .. هل إحنا محتاجين 15 وإلا 25 علشان نرجع كويسين تاني, علشان نرجع بالايجابيات اللي فيها الأمانه والالتزام والنظام والصح والغلط والمفاهيم الايجابية اللي المفروض تكون في مجتمع زي مجتمعنا.. إحنا مهما إن كنا المفروض ما نصنفش تالت لأن التالت ده انا شايفة ان فيه بره مصر تـالت ورابع في أقوى بلاد العالم اللي بيقولوا عليها من البلاد اللي ماسكة مفاتيح العالم …
أنا ساعات بابقى في مكان وأقول عمار يامصر…. وفي نفس الوقت بأقول ياريت وليه مانكونش زيهم هنا …
بس لما بأدخل جوه ليه بأتمنى … بأتمنى نضافة و بأتمنى التزام وبأتمنى نظام وبأتمنى صدق وأمانه.. بس أنا أتمنى شعبي يبقى كده .. أتمنى أنا منهم أبقى كده .. أتمنى إنا حياتي وبيتي وأهلي يكونوا عايشين في وسط بيئة صحيه وولادهم يطلعوا كده بس بمصريتهم .. مصر جميلة أوي أوي أوي.
من زمـان زمـان بأقول .. دمرنا بلدنا بإيدينا وبالأفكار اللي جت ملت دماغنا وهي السبب في تغيير مسار حياتنا سواء من سياحة واقتصاد وأفكار ومعتقدات وحاجات كتيرة اوي .. البساطة احلى حاجة في الدنيا عقدنا نفسنا بنفسنا .. عقدنا حياتنا بالمنظره والمظاهر وسبنا أصول الحياة ..عقدنا نفسنا بالماديات ونسينا الانسانية وإزاي نتعامل مع بعض بقى هدفنا وحده إزاي نقدر نكسب من بعض .. سبنا حياتنا هي اللي تمشينا وفي نفسنا مفكرناش فى بكره حيكون فيه ايه في حياتنا .. الإتكالية بقت هي سمتنا.. والطلبات بقت هي هدفنا وعاوزين من غير ما نحط مقابل لا بشغل ولا إنتاج ولا التزام ولا أي حاجة من الحاجات اللي مفروض تدي طاقة ايجابية لأي حاجة لا لنفسنا ولا لمجتمعنا ..
لو ابتدينا شوية شوية بتغيير سلوكياتنا ونبتدي نبص على قد إمكانياتنا حنقدر نعمل ايه بطريقة ايجابية أعتقد إن حتكون دي اول بداية اننا نقدر نعدل من اسلوب حياتنا وبلدنا ..
الموضوع مش محتاج حاجات كتير .. الموضوع أبسط من البساطة, الضمير و نفكر واحنا قدرتنا للاستيعاب سريعه.. الالتزام بالنظام .. ما أعتقدش إن البني آدمين لازم تبقى الهمجية هي اسلوب حياتها لازم يتعلموا شويه شويه إزاي يخلوا الدنيا أبسط من كده ومنظمه وداخلها احترام … المواضيع اسهل بكتير من إن إحنا نعقدها ..كل واحد عارف جوه نفسه ممكن يعمل ايه .. إنما هو ما بيعملش بيه علشان هومستعجل وبيستسهل طريقة حياته ياريت نركز على التربيه تانى والاحترام..
المستوى الاجتماعي ما بقاش فارق مين معاه فلوس ومين ما معهوش فلوس لإن بقى الفكر واحد في كل الطبقات.. حتى الطبقات كلها اندمجت جوه بعض ما بقاش فيها تفرقة ولا قد حد عارف هو مين ولا هو بتاع ايه ولا حياته ايه للأسف الشديد كان مهم أوي كل واحد يعرف هو واقف فين في مستواه, لأن ده من ضمن الالتزام بالطبقات هو برضه نوع من انواع النظام الاجتماعي، مش انه هو الطبقية بإن البني آدمين يقللوا من شأن بعض ولكن لهم أدوار.. كل واحد له دور والإلتزام بالدور بتاعه بس … مهم أوي أوي كل واحد يعرف حدوده ايه علشان يقدر يدي في نطاق حدوده وينتج .. إنما اللي فاكر نفسه ده بتاع كله .. وانه بقى بتاع كله ده: الناتج بتاعه بيقل والعطاء بتاعه بيقل واسلوب حياته بتبقى زائفة مش هو .. وبالتالي بيأثر على سلوكياته وانتاجه بالسلبية للمجتمع ..
الثقافة مهمة جدا جدا جدا لأن الثقافة دي توجيه أصلا .. أنا مش بأتكلم عن الثقافة على التعليم والمدرسة لأن ده حاجة تانية خالص أنا بأتكلم ثقافة يعني معلومات البني آدم لازم يبقى عنده معلومات .. يبقى فاهم هو بيعمل إيه ليه وفاهم دي علشان ايه وفاهم هو تاريخ حاجته ايه و تاريخ اللي بيقلده ده ايه وكل معلومة بيسمعها يستفسر منها ما يرددهاش من غير ما يعرف اصولها لأن كل ده سلبيات بتيدي تأثيرات سلبية على المجتمع ..
إحنا حياتنا فيها حاجات كويسة كتير ولكن أصلاَ, اللي حصل فيها ده بقت حياتنا صعبة اوي.. مش عايزة أقول وحشه .. بس أنا لسه بأقول حتى حتى حتى باللي بيحصل فيها أنا بحبها .. بس نفسي تبقى أحسن من كده ونفسي ياخدوا بالهم من بعض, نفسى يفكروا شويه نفسي يحبوا بلدهم علشان يقدروا يعملوا حاجة . .. حبوا بلدكوا اوي ما تعرفوش قيمتها بجد .. مصر جميلة ..صدقوني كفايه الروح والضحكه من القلب
أنا بحب مصر
مصريه
2017

شاهد أيضاً

القاتل واحد وضحاياه كثيرون ! .. بقلم : عبدالرحمن مهابادي – محلل سياسي خبير في الشأن الايراني

إذا نظرنا إلى مشهد الشرق الأوسط والجرائم المرتكبة في هذه المنطقة من العالم ليس من ...