اليوم الجمعة 24 نوفمبر 2017 - 9:31 صباحًا
الرئيسية / مقالات / من خواطرى : آه من نسيانك يا سمكه .. بقلم : منى حسن

من خواطرى : آه من نسيانك يا سمكه .. بقلم : منى حسن

ايه ده معقوله!  انا مش فاكره.. قولى كلام غير ده,  معقوله قولتيلى وانا مش قادره افتكر خالص ولا استرجع ..

كلام بقى متكرر جدا,  بقى كل نص ساعه ودقيقه وفى اليوم 100 مره بتتقال….كلمه  مش فاكره!!!

مالهاش دعوه بالعمر,  بتسألى طفل واكبر شويه بيقولك مش فاكر بتسألى العشرينات والتلاتينات بيقولك مش فاكر, واكبرمنهم برضه مش فاكر, اهالى مش فاكره نص الحاجات والاغرب تسألى العمال هما كمان مش فاكر!!

كلمه سهله  مش فاكر وتملص منهم للمفروض:  كنت تجيب .. مش فاكر , مش المفروض تعمل.. مش فاكر, مش كان فى معياد.. مش فاكر!!!

الموضوع بقى عام, و كده من يومياتك بقى فيه عدم تركيز, وعدم استيعاب لواجباتك ومسؤلياتك على حسب ظروفها.. و النسيان فبقى دلوقتى سمه من سمات الحياه, علما هو وجوده او جزء من وجوده الطبيعى فى تكوين البنى ادام  لتخيف حمل الحياه,  ومش لهروبه من المسؤليه لانه ملزم انه يعرف واجبات حياته ويعرف ان عليه ايه من مسؤليات والتزامات, لان بقت  اسهل حاجه عنده يقولك مش فاكر!!

فى ناس فعلا مش فاكره, وفى ناس تانيه مش المفروض ادعاء انى مش فاكر, وده منهم الفتره الشبابيه, لانها دى اكتر وقت بيكون البنى آدم عنده قوه تركيز جامده جدا, بيبقى عاوز ينجز كل حاجه,  وعيبهم ان هما بيفتكروا اللى هما عاوزينوا بس, اى حاجه بتدخل فى طريقهم مابيفتكروهاش,  لو مش فى احتياجاتهم او مش فى يومياتهم او لبكره بتاعهم..

انا مش حادخل فى تصرفاتهم ولا انتمائتهم ولا طريقتهم ولا اسلوبهم.. انا حاتكلم بس فى موضوع النسيان!

وده فى نظرى نسيان مقصود, بدون تحمل مسؤليه بقى سمه عصر وسمه قاتله  دى سمه غير صحيه او ايجابيه بالمره, دى سلبيه ميه فى الميه سواء هى بتأثيرات او ضغوط..

المشكله الكبيره فى موضوع النسيان.. الاول النسيان ده انواع ودرجات:  فيه درجه تسأل عملت كذا؟  آة معلش اصلى كنت بعمل كذا حاجه وماركزتش, وفيه درجه انا ماخدتش بالى اصلاً من ان كان فيه حاجه اتقالتلى وتضيع وقت بالبراهين والمواقف لاسترجاع الذاكره, وفيه درجه اللى هيه كأنها ما تقالتش اساساً وبتسمعها كل مره بانه اول مره, ودى ممكن يكون فيها ناحيه مرضيه, نتيجه قصور دوره دمويه, او زهايمر وحاجات كتيره تانيه, وفى درجه حد يقولك انا مش فاكر لتكون مخرج لكل المواضيع,  وفى درجه طبعا زى الاطفال يانهم بيتهربوا من واجباتهم وبقى الكباربيعملوا زيهم كمان وهو مدرك انه لازم يعمل..

المشكله ان بقت ذاكره السمكه دى بتخلق مشاكل كتيره اوى, وفى نفس الوقت بتأذى ناس كتيره اوى مقصود او غير مقصود, وفى نفس الوقت بقت احيانا كوميديه جدا لان فيها مواقف كارثيه زى اللى بيحط مفتاح العربيه فى التلاجه, زى اللى بيرمى ورقه مهمه فى الزباله, وغيره كتير من مواقف التلقائيه وانت بتعمل كذا حاجه فى نفس الوقت او دماغك مشغوله او عندك المشكله الاعظم فى عدم التركيز.. وطبعا عدم التركيز ده ناتج عنه النسيان!

الضغوط بتاعه الحياه ليها عامل اساسى فى النسيان, كتر الضغوط فى الحياه, الاكتئاب له عامل فى النسيان, الحزن الشديد له عامل فى النسيان, الصدمه والالم لهم عامل فى النسيان, فقد عزيز ليها عامل فى النسيان, حاجات كتيرمن صدمات ظروف علاقات كلها ليها عامل فى النسيان..

بس كل ده فى زمانا كان بيحصل وبناخده على رجيلينا ونعدى!! ليه دلوقتى بقى تأثيره قوى,  مش مبدا عدد ناس كترت ولا سن .. هى ليه بقت قويه كده على البنى آدمين؟

هى الضغوط زياده صحيح, المآسى بقت كتيره صحيح,  الاذى بقى عادى صحيح,  بس الحياه طول عمرها فيها حاجات حلوه وحاجات وحشه,  ماهو حياه البنى آدم كلها مش ماشيه على وتيره واحده, واكيد فيها مواقف دمها خفيف وحاجات كويسه مليانه ايجابيات..

فـ ليـه مانحاولش ان احنا ندرب نفسنا على تشغيل عقولنا اكتر,  ليـه سيبينه كده مع نفسه,  ليـه دخلت فيـه      ” هو يجرى ايه يعنى”,  علشان هو يجرى ايـه دى  بقت شويه  فيها نوع من التخلى عن المسؤليه, عن التركيز, عن الجديه, عن الاحساس بالعمل عن الواجب عن حاجات كتيره اوى وده اول خيط للنسيان..

النسيان اللى نسجناه, اللى عايشينوا وابتدينا نصدقه ونتريق علي نفسنا بكلمه بإن جالنا زهايمر, هى الشماعه اللى احنا بنرمى عليها  حاله الزهايمر او ذاكره السمكه اللى احنا اللى عمالناها, واحنا اللى بنصدقه واحنا اللى متامدين معاه, وابتدى يبقى جزء من يوميتنا وشخصنا.. ولما حتى بنتكلم بنقول ” لا يا عم كلمه فكره لاحسن ينسى”  وبقت اخر كلامك اوعى تنسى !!

ماينفعش لان فى مواضيع فى الحياه ماتصلحش تكون ماشيه فيها الوتيره دى,  لان مصدقيه البنى آدم بتتهز..ولو ماكانش ده عامل مرضى عنده او بيمر بضغوط مفهوم بيها موقفه , يبقى مافيش مبرر, المبرارت التانيه حاتكون لا هو مهتم اوعاوز.. فـ دى دخلت فى زون احمر معناها التملص من المسؤليه, والواجب , والعطاء تحت ستار مش فاكر و نسيت!!

وكده حاتتداخل فى محور حياته وعيلته و شغله وانتاجه, وعلى مسؤلياته اللى حتقع فى السكه بأن دى مهمه ودى مش مهمه علشان انا نسيت ونسيت ونسيت.. ولما بفتكر يا بيبقى فيها مشاكل يا بتبقى عدى وقتها او بتبقى واقع!!

فهنا النسيان مشكله بقت قائمه ودائمه, لدرجه بدءت تهدد وتاخد شكل طبيعى للحياه بقت حاله مروعه, مابقتش واقفه على ارض صلبه بقت هشه مافيهاش مصدقيه, بقت على تلت إربع يوم طاير, على يوم تكاليه لبكره والاسبوع الجاى, على يوم بقى فيه يا عم دماغك, على يوم مبقاش فيه انتاج..

النسيان بيدخل فيه جزء من الاكتئاب, وكتير اوى من الظروف اللى احنا بنمر بيها بتخلى البنى آدم ساعات متضايق من الضغوط والوضع والمسؤليه… بس اكتئاب دى كلمه كبيره اوى ليها تعريفات تانيه, انما المضايقه دى مضايقه وقتيه من ضغوط يوميه حياهده اللى بنمر بيه.. كل واحد لازم يراجع نفسه تانى ولانها مسؤليه بشر بمواجهه افعالهم وتفاعلتهم وقوالتهم وطريقتهم الصادمه بسلوكياتهم,  كأن عيشتهم كانت فى مكان مقفول وفجأه اتفتح باب وخرجوا لمكان غريب من غير التزام !!

هو ده ان الواقع  يكون بالسلوكيات دى!  هو ده الطبيعى ان البنى آدمين يتصرفوا كده.. لو ده استمرار فى تصرفهم يبقى احسن الواحد ينسى !!

بس الحياه مش كده الحياه فيها المواجهه فيها اتعلم فيها اعرف فيها اقف واقع فيها افرح وازعل فيها احب الحياه بكل مافيها.. كويس اوى ان البنى آدم بيتعلم من تجاربه علشان خاطر هى دى سنّّه الحياه وانت بتمر بحاجات كتيره اوى فى حياتك وناتج تجارب حياتك.

المشكله كمان فى النشئ الجديد, اللى لسه طالع صغير برعم و نبته صغيره بتقولك انا مش فاكر,  ومشكله فى الاكبر منهم شويه بيقولك انا مش فاكر!!!

لما هو دلوقتى استسهل مش فاكر, حايكون ايه الموقف فى مراحله العمريه القادمه ويكون عامل ازاى ولا حايكون مين اصلا..  ولا ده وقت ده زى مابيقولوا مش حايكون وقتك وماليك فى الجاى  وعيش دلوقتى ولا ماتوجعاش بالك بيه, على مبدء عيش دلوقتى انت مش ضامن عمرك بكره ..

ماحدش بيضمن عمره ولو بعد ثانيه انما البنى آدمين بتسلم بعض بتنصح بعض بتقول لبعض بتوجهه بعض,,

يعملوا بيه مايعملوش دى حاجه تخصهم,  انما دى رسايل البنى آدم فى العيشه, واكيد محدش بيأثر على حد و محدش بيضغط على حد, ولكن البنى آدمين الطبعيين السويين بيوضحوا وجهات نظرهم وخبراتهم دايما بإى ان كان طريقه.. وواجب اللمتلقى يسمعها مش شرط ياخد بيها.. انما يحترمها ويفهم هو بيقول ايه واللهى مشيت على هواه ماشى لو مامشيتش هو حر.

انما برضوا الدنيا مش كده!  الدنيا دى فيها دوره .. زى ما الشمس بتشرق وبالليل القمر بيطلع والريح رايحه جايه والفصول بتتغير والساعات بتجرى وسنين بقت زمن فات وجاى.. البنى آدم له مدار حياه لازم يلتزم بيها لانها مع الوقت ناتجها خلاصه عمر هو بيسلمها للى وراه علشان هى دى تكمله الحياه..

ولو احنا عيشنا وكملنا فى النسيان اللى احنا عايشين فيه ده زى السمكه, واهيه عايمه وخلاص والسرب اللى ماشيه فيه هو اللى ماشيها وادى ممرها فى الحياه  وبعدين…. مش حانبقى حتى سرب للسمكه!!

وآه من نسيانك يا سمكه وخلاصه عمر دابت فى سنين راحت تدور على يوم متلاقاه..

مصريه

2017

شاهد أيضاً

القاتل واحد وضحاياه كثيرون ! .. بقلم : عبدالرحمن مهابادي – محلل سياسي خبير في الشأن الايراني

إذا نظرنا إلى مشهد الشرق الأوسط والجرائم المرتكبة في هذه المنطقة من العالم ليس من ...