اليوم الأربعاء 13 ديسمبر 2017 - 5:15 مساءً
الرئيسية / مقالات / من خواطرى :  حدادِك يا مصر.. بقلم : منى  حسن

من خواطرى :  حدادِك يا مصر.. بقلم : منى  حسن

من بُعد سمعت اخبارك يا مصر, ماعرفتش امسك نفسى ودموعى ولاقيتها نازله كأنها شلال مش عارفه احجمه..  ونَفسى مذهوله من مذبحه اوناس فى روحانيه وسلام للصلاه.. سكينه روح

سكينه روح سُلبت غدر وهى خطفه موت,  روح فى حاله صفاء, سايبه كل حاجه وراها ودخله علشان تصلى لربها, بصرف النظر عن داخليات الروح دى وتكوينها, بقوتها او ضعفها او خيرها ولا شرها ولكنها روح حره فى روحانيتها!!

كل ماأفتكر احساس واللحظه البشعه بدخول القتله عليهم بحس: اد ايه البنى آدم ضعيف وان روحه تتسلب بهذه الطريقه واللحظه دى بشعه مفزعه ووحشه اوى

خطفه الموت صعبه جدا سواء حادثه طياره, حادثه عربيه او سواء موته طبيعيه,  فى لحظه.. الموت هو لحظه ولكن..  ده غدر!!

ده موت غدر؛ الاقدار بيد الله والموت بيد الله وكله مقدر ومكتوب, ولكن المدبحه دى بايد بنى آدمين, زيها زى مدبحه كنيسه,  او اى ان كان مكان,  كلها مدابح موت وشر.. اخرتها ايه؟

اخرتها علشان ارض ولا علشان مال ولا علشان قوه ولا علشان خاطر دين!!   وهما لا دين لهم

دين ايه اللى بيتكلموا عليه وهما لا يعرفوا معناه, لان هو مش من حقه يِحق لحد ان هو يبقى دينه ايه, ولا يملى عليه إن دينه ايه.. لان علاقته بربه دى علاقه حره بروحانياته وعباداته

انما علشان ارض وقوه وسلطه وعلشان سيطره ترجمتها فى الاخر ماديات, بتلغى آدميه البنى آدم والبشر

الملشيات والمرتزقه والقتله دول كلهم جابوا الفلوس دى منين, لان فى الاخر هى الفلوس اللى حركتهم, مش عقيدتهم واتلغت عقولهم .. حتى لو تحت مسمى عقيده ماهم برضه دوروا على المال واشتروا بيه اداه لقتل روح بريئه..

التمويل اللى بيجى ده بيجى ليه,  دخولهم اصلا بلدنا ازاى؟؟

حدودنا مفتوحه اوى كده!!  هما الشر اللى جوه ارضنا دول  مابيخلصوش؟

طول عمرهم كام قبيله بدو موجودين عايشين مسالمين.. ولكن حق البدو له قانون وثأرهم سخن إن ماكانش ده  تار!!

واما اللى بيتسللوا وسكنوا الجبال السنين اللى فاتت من الانفاق ولسه ….  متسابين ليه حرام بقه كفايه!

تساؤلات تساؤلات؟؟ امتى حانعمل حد للدم ده

مره صحرا غربيه مره سينا مرات العريش, وبعدين وبعدين وبعدين  يا حماه الوطن

احب تراب بلدى ولا اشك لحظه فى قدرات جيشها بس محتاجين حزم محتاجين امان لاحسن قلبنا اتوجع جامد اوى المره دى .. ميات, ميات ارواح ماتوا غير اللى اتعوروا انا مش مصدقه الرقم ولا مستوعبه القلب ميت للدرجه دى,  البنى ادم معدوم الحس والضمير ملغى الاداميه مغيب الشعور, والعمى اللى على عنيه والبصيره مش قادر يميز بيها..

فى الاخر يقولك علشان دول صوفيين .. خدعه مالهاش وزن,  حتى اللى فكر فيها فكرُه عقيم ونسبها للصوفيه وهو مذهب روحانى  حتى لاضرر منه..

القلب الميت ده من بلاد غير,  مش ممكن يكون انسان له مله ودين او رب ومن اكون لاحكم  ولكن صعب ومش مقتنعه .. وصعب السبب اختلاف مذاهب!!

وكلام وتحليلات واقوال لشيوخ من كل حته ومصدر, واغرب تحليل سمعته اول ماحصلت المدبحه هو تحليل من احد دكاتره اعتقد فى جامعه ما بلندن:  بان المتطرفين الدواعش انهم اصحاب عقيده يعتقدوا  هم اصحاب الارض وان بالنسبه لهم الصوفيه كفر!!

والصوقيه مذهب ارتقى بالروح فى حب ربنا والزهد فى علاقته بيه ووردوه لمدح الرسول مع متابعه عيشته اليوميه الدنيويه العاديه ومتتأثرش..

وان الصوفيه مذهب قديم وله تابيعين فاهمين الطرق وتعاليمها.. اما الايام دى انتشارها موضه اكتر من انه اعتقاد كأى موضه بتنزل بلدنا بافكار تأثر وتبلبل افكارنا.. ولقله ثقافتنا ننقاد لها بسرعه!!

و اما إذا كان الدواعش اصحاب عقيده حتى لو متطرفه فهم مدركون ان الارض ارضنا مش ارضهم .. انما مين اللى نفسهم تبقى ارضهم والعالم يبقى ملكهم!!

عمليه ملخبطه اوى, انا برضه مش سياسيه وانا فنانه تشكيليه بس انا مصريه ..

وقلبى موجوع عليكى يا مصر

مصريه

24-011-2017  

شاهد أيضاً

متسول يلتحق بجامعة كامبردج .. بقلم : شكرى رشدى

الإنجليزي »جيف إدواردز»‬ من مدينة »‬كامبردج» وهي مدينة تقع في شرق إنجلترا، قضي معظم حياته ...