الرئيسية / مقالات / من خواطرى: همس التواصل .. بقلم : منى حسن

من خواطرى: همس التواصل .. بقلم : منى حسن

لما بأفكر في الناس وتعاملهم ونظراتهم واللغة بتاعتهم وتجانسهم سوا, سواء في النظرة او اللمسة أو الحركة أو نطق الكلمة أو طرفه العين ورمشتها ونظرتها او هزة كتف وحركه كف… كل دى لغة تألف…
إيه هي اللغة، جت منين, مين عمل اللغة، مين نطق اللغة، مين حط حروف اللغة, مين قال اول كلمة إتنطقت إزاي كان سببها ايه! وهل هي كان مجرد صوت وَلا كان نغمة وَلا كان حرف وَلا كان مجرد خروج طاقة من جوه في شكل نبرة, وهل اللغة هي اللي انعكس بيها لغة العين ولغة الوش والحركات واللمسه والهزة والرمشة، وَلا كل ده كان موجود قبل نطق اللغة اصلاً ….
التعامل مع الناس ساعات بيكون من غير ولا كلمة، تلاقي اللي قدامك فهمك اوقات يا بنظره وساعات ممكن تقعد تهاتي من هنا لبكره واللي قدامك مبيفهمش وبيتوجع قلبك على مفيش … وساعات تقعد تتكلم مع حد وياخدك على قد عقلك ومتوصلش لحاجة معاه، وساعات عينك تقول لحد حاجة في وسط الكلام يأثر فيه أكتر من أي حاجة تانية وحاجات كتيرة أوي من هذا القبيل….
الكلمة حلوة, مفروض انها تبقى حلوة ، علشان تكون كلمة بناءة دايماً، وهي لغة حوار دايما وهي حلقة تواصل ووصل بين الناس.. الكلمة هي مفرد جملة مع ان فيه كلمة ممكن يبقى وزنها وزن القنبله، زي النظرة وحدتها ممكن تكون قاتله…
التعامل مع الناس شئ مذهل، وبأقف قدامه كتير أوي وبأتفرج عليه مع النفوس البشرية، في نظري ده اعجاز وكمان في نظري إن إحنا إتولدنا كلنا صفحه بيضا ، يعنى معندناش شر, ممكن يبقى نسب التفاعلات مختلفة ممكن نسب الذكاء مختلفة، ممكن نسب الحس مختلفة ،ممكن نسب الروح الخفيفة مختلفة, ممكن النسب فى الاستيعاب تبقى مختلفة ولكن محدش اتولد شرير, وأعتقد ان النسب دي هي اللي بتخلي استيعاب البشر هو اللي بيكون عندهم الحاجات السلبية … زي الحقد والحسد والشر والكره والغيره الشريره وباقى السلبيات…
لو فكرنا إن كمان فيه عوامل مساعدة بالنشأة والبيت والعيشة مع المدرسه والناس اللي حواليه بتأثر على التفاعلات دي كلها …
كل طفل بيتولد لازم أهله والبيئة اللي حواليه سواء مدرسته سواء الناس، أصحاب أي حد من المجتمع المحيط يحتويه … الاحتواء ده بيكون وبيشكل طفل طبيعي وكل ما بيكبر بيتبلور في جو طبيعي فبالتالي مبيبقاش عليه تأثيرات سلبية كتير, والمفروض انه بيكتسب خبرات مع الوقت بمسؤليات كل مرحله عمريه وماتأثرش عليه بالسلبية ولكن يتفهم السلبيات اللي حواليه لنضجه بالايجابيه …
اللغة بتأثر، الناس اللي حواليه بتأثر ، النظرات بتأثر ، الأفعال بتأثر ، المواقف بتأثر وطول ما إنت ماشي في حياتك بيقابلك مواقف, بيقابلك لغات, بيقابلك نظرات, بيقابلك نفوس بشرية مختلفة, فكل حاجة من دي بتترجم للغة .. فيه اللغة الصوتية وفيه اللغة الجسدية وفي لغة من نظرة العين وفي لغة حسية محدش يقدر يشوفها، غير لغة الجسد اللي هي الكيمياء كلها، والايماءات و اللي هي لما بيقولوا كده الأرواح بتتلاقى … و ده كله بيأثر!
إنما اللغة كلغة بالنسبه للناس هي اللغة السمعية، اللي هي اللغة الصوتيه، بتطلع بنبرة وصوت وحس ولهجه، دي لغة اساسها التواصل المباشر, وبتأثر في البني آدم وبتنم عن شخصيته بنسبة كبيره, لأن هي أصلا شخصيته في طريقته في حواره في اسلوبه في التعبير عن ما يدور جوه ذاته وفكره، واحيانا بيستعمل لغة تانية لغة إشارته .. فيها لغة حوار فيها حاجة بيتعبر بيها, واستخدمها كمان لمن لا يقدر بالنطق , وده تبسيط مختصر للغه الحوار والتواصل بتاريخها لانه موضوع دسم …
هل ممكن كانوا زمان بيدقوا كالغه، ومنها طلعت اشارات وأيماءات واخذ منها اشارات السيمافور وغيرها زى الموريس لحد ما ابتدا النطق بالكلام ده كامثال.. ممكن أشياء زيهم, مش لازم هما الموريس والسيمافور، ولكن انا اقصد ان اكيد اللغة مشيت بتدرج … ممكن تبقى حجر وقع عمل صوت «بوم» فحد قال «بوم» ، ممكن صوت الميه ممكن صوت الشجر ممكن تقليد صوت الحيوانات، أكيد في شئ دفع أول بني ادم للنطق …
من الحاجات الحلوة أوي في الحياه هو الصوت والكلام واللغة , وطبعا فى حاجات كتيرة تانيه حلوه في الدنيا ، واللغات كتير بتقرب الناس من بعض, وناس مابتفهمش بعض حتى لو اتكلموا لغه بعض, وفى بيفهموا بعض بلغات تانية ممكن تبقى بلغة عين, بلغة اشارة, بلغة حس, بلغة الجسد BODY LANGUAGE و دى لغه قويه جدا, ان جسمك بيتكلم مع صوتك وفيه ذبذبات تتوالف مع اللى حوالك, فيه دايما طريقة للتواصل, فيه حاجة دايما بتخلي البني ادم يفهم التاني بسلاسه عجيبة اوي، ده دليل على ان اللغة مش لهجة و صوت بمعنى مش لازم تكون مرتبطة بجنس وبلد, إنما هي لغة عامة بشرية أي حد بيتواصل بأي حد بطريقه ما، هو مش لازم يدخل في اساس حياته أو بشكل شخصي، ولكن في العموم حيفهموا بعض .. واعتقد دي من اسرار الحياة إن الجنس واحد والارتباط واحد كله بيتكلم لغة واحدة ,اللغة جوهر كينونة الإنسان , زي ما جسمك صوته اعلى من سمعه, ما هو احساس واحد مع الفارق.
الله على الخالق وسبحانه …
مصريه

شاهد أيضاً

كلمات : الحصار .. بقلم : اسماعيل على

قال تعالي: »إنما الصدقات للفقراء والمساكين والعاملين عليها والمؤلفة قلوبهم وفي الرقاب والغارمين وفي سبيل ...