اليوم الجمعة 19 أكتوبر 2018 - 7:26 صباحًا
الرئيسية / مقالات / من خواطرى : عندى أمل .. بقلم : منى حسن

من خواطرى : عندى أمل .. بقلم : منى حسن

كلام وحوار وأحاديث عن الحب عن الحياة, عن القدر, عن الدنيا عن العيشة,  وعن اللي بيحصل في الحياة دى من تطورات وتفاعلات وتعاملات عن كل حاجة, ومع كل نَفس بياخده البني آدم دلوقتي ..

لو إحنا فكرنا ايه اللي بيجرى; حانستعجب.. ولو إحنا راجعنا نفسنا مع امبارح والزمن اللي فات حانستعجب..  ولو إحنا لقينا ان اللى جاي احسن حانستعجب.. حانفرح صحيح بس حانستعجب ..

حانستعجب لأن إحنا المؤشرات كلها اللى موجودة دلوقتى مابتديش الاحساس ده,  كل حاجة بتجرى فيها حسبه بقى مافيش حاجة بتطلع من القلب, مافيش حاجة بتطلع بعفويه, مافيش حاجة بتطلع بتلقائية  كل حاجة بتطلع محسوبه .. حاعمل ايه .. وعلشان ايه.. ومردودها ايه.

انما الاحساس التلقائى بالحاجة نفسها بكل مشاعرها مابقتش موجودة ..

هل تطور الزمن له دور في الموضوع  وَلا الظروف!

من وجهة نظري هي ظروف باقدارها.. ظروف البني آدم بتواجده في المكان الصح في الظرف الصح في المقابلة الصح .. أو في المكان الغلط  في الوقت الغلط  مع البني آدم الغلط .. أو في الوقت والمكان الصح مع البني آدم الغلط,  او زي ما يكون الموقف,  وتعاملك في هذه اللحظة مع بنى ادام  سواء بالحب  او بالشغل  او بالمعاملة  او بالتعارف,  ده بيبقى باب حياه جديد بيدخل جواه بكل ما تحتويه ومكتوب  وده قدره من حياه هذا الباب..

البني آدم الطبيعي بيتفاعلاته لازم بتكون من قلبه من روحه وبوجدانه بيوزن اموره بعقله لكن مش العكس,  بإن يوزن بالعقل كل التفاعلات بتاعته ..

العاطفة المفروض بتلعب دور كبير مع البني آدمين,  ولكن في وقتنا الحالي العاطفة مبقاش لها أى وجود, التفاعل بالعاطفة تقريبا نَمل كأنها اترميت فى بير وطبقه اتشمعت عليها..

ومقياس المواضيع بقت بسيطة سطحيه جدا لدرجه ان تفاعلاتك معاها بقت مجرد سمعية مابقتش تدخل تمس قلبك, حتى تفاعلاتك بقت عقلانية الردود يعني:  يا نهار أبيض .. حصل كده مش معقول!!   وخلاص الموضوع  وقف لحد مش معقول,  بعد كده مابقاش له مردود ولا تفاعل او تأثير ووقته بقى قصير.. قليل اوي اوي لما حاجة تمس الروح او تمس الاحساس.

إنت بتنزل الشارع بتتعامل مع ناس ، وكل بني آدم بيبقى لك معاه تعامل بطريقة معينة,  والطريقة دي فيها تفاعلات وتعاملات,  حتى العفويه بتاعتك في التفاعلات والتعاملات بقت محسوبه على قد رد فعل اللي قدامك, كلام كبير اوى يعنى بقت كل حاجه بحسبة مع ان فماينفعش عاطفه البني آدم تعيش بحسابات مع ان حياته كلها معتمده على حسابات.

اكيد حايجي الوقت ونفكر تانى ونراجع نفسنا ونتسأل وبعدين هى العيشه الطبيعيه فين!!

طبعا واكيد النشأة والتربيه كان ليها دور كبير في زمانا ونشأتنا .. ليه بأقول زمانا علشان احنا زمن تاني زمن الخمسينات والستينات وانما الاربعينات ونازل زمن تاني خالص فكر تانى خالص اسلوب تانى مختلف, زمنا كان فيه حلم كان فيه حب كان فيه جدعنه كان فى ترابط كان فيه التزام بمواعيد كان فيه عتاب وتسامح كان زمن جميل اصحابه جواهم عايشينه وبيتمنوه من كتر التغيرات اللى بتمحى ذكرياتهم..  وكل الازمنه دى بقوا عاملين زي بعض لا هما عارفين يتعاملوا مع الزمن ده ولايتقبلوه ولكنهم متاعيشين فيه ومعاه..

و اعتقد الكلمه انهم مجبورين لموكبه شباب الزمن الحالي لانه منهم اولادهم ومجتمعهم..

إحنا زمن بيتشد عليه خط وبالتالي مجهد … مجهد من اللي بيجرى, مجهد من المواكبه, مجهد من اللى بيحصل حواليه, مجهد من الفعل، مجهد من الاسلوب, مجهد من التغيير وردود الافعال, مجهد انه موجود فعنده  مشكلة ..                          رافض رافض رافض,  وفي نفس الوقت بيحاول ان يبدي وجهه نظر او يقَوم او انه يعلم او يدي الخبرة بتاعته ولكن فى الآخر خالص مردود مجهوده مهدر, ممكن يكون مردود مجهوده فى النواحى العمليه يكون فرصته احسن اما في النواحي الاجتماعية نسبته قليلة اوى, إلا ممكن في محيطه, انما المجتمع الأكبر لأ

لأن المحيط الأكبر ده محتاج موجه كبير من مجموعه كبيرة جدا مثقفه بخبراتها متكاتفة تقوم قومه واحده تكسح طريقة فكر وتزرع بدالها ونتشر اسلوب حياه صح ..

حيقولولي ايه هو الفكر الصح وحاندخل في جدال مع الشباب,  ولان الفكر الصح عمر ما حد بيختلف عليه ومنه طريقة اجدادنا.. لأن طريقة اجدادنا كانت ماشية بالعاطفة والخبرة, والعاطفة والخبرة اقوى بنسبة كبيرة اوي بتحكيم العقل
والخلطه دى بتؤدى للكمال ونوع من الايجابية الزايدة, مين اللي حيقدر يوصل للدرجة دي دلوقتى,  وبقت الحياه العمليه هى اللى غالبا حاليا.

لو حد من زمنا دخل في مشروع  بيحبط من ردود الأفعال,  لو حد من زمانا دخل في قصة حب يذهلونك من الفكر والاحساس,  لو حد من زمانا دخل في معاملة مع حد من الشارع بيجيلوا انهيار,  لو حد من زمانا دخل مكتب حكومة بيبقى كأنه دخل كوكب تاني,  لو حد من زمانا قعد مع مجموعه من الأربعينات والتلاتينات بعد شوية بيجيلو عاصفة من العصبية وقلبت لمحاضرة .. حنقول هي بقت فجوه  زي اللي حصل مع اجدادنا وأهالينا .. بس هي مش فجوة لأن إحنا مدركين كلنا اللي بيجرى واحنا كلنا بقينا في مركب واحدة بس المركب بتميل لقدام ولورا مش قادرة تمشي عدله ده غير ان الريح  واحداث الحياة بتخبط فيها يمين وشمال, فإمتى المركب دي حاتستقر وتبحر عدل في بحرها .. هو احنا مش كفاية علينا الامواج  والعوامل الطبيعية اللي بتجرى… لازم يبقى فيه توافق, لازم يبقى فيه فكر يوصٍل او يوحد الناس دي مع بعض لازم يبقى فيه رابط, لازم يبقى فيه روح لازم يبقى فيه حاجة تخلي الناس دي كلها مترابطة مع بعض في التواصل في التعامل في التفاعل في الاحساس, هو لازم حيكون في اختلافات لكن متكونش الاختلافات الجامدة جداً والجذريه زى اللي احنا فيها … آه طبعا ناتج عن الفقر وعن الغنى وعن العيشة وعن الحياة وعن الثقافة وعن وعن وعن …. بس البني آدم  بني آدم في الآخر,  وفطريه البني آدم لوحده من غير اى حاجه ولا تاثير متغربل كده بسجيته بيعرف يتعارف ويتعامل ويتواصل مع الآخر وهي دي اللينك اللى نبتدى منها هي دي النقطة اللي لازم نبحث عنها علشان يحصل التواصل الصح مع البني آدمين وخصوصا في مجتمعنا لأن مجتمعنا زي المغناطيس بيلم كل حاجة من الدنيا وبيتفاعل معها ومن قلة استيعابه او علمه وجهلة بيتعامل بيها ويعشها من غير ما يعرف أصولها,

فبالتالي بتلاقي عندنا كل حاجة وممكن تكون بردود افعالها الزيادة وهما مش عارفين ليه, ده غير ان إحنا بنبلورها ونطورها ونزينها على هوانا اللي هو يناسبنا,  وكتير بيكون له طعم وشكل احلى, ده غير ان ممكن في جيبي ما يكونش فيه قرش صاغ ولكن عايشة عيشة الملوك, الكسل  الشعب اتربى على كده.. حالة صعب.

الحب مهم اوى,  القناعة مهمة اوى, الرضا مهم اوي, الأدب مهم اوى, الاحترام مهم اوى, الذمة والضمير مهمين اوى, المسامحة مهمه اوى العمل والنتاج مهم اوى.

فالموضوع تركيبه عجيبه فالموضوع أصعب ما يكون..

أنا حأفضل لسه جوه قوقعتي لحد ما أشوف وأتفرج على اللي بيجرى لأني لسه مقتنعه إن التغيير لسه بدري عليه ومش عايزة أقول أنه مش حيحصل لأني دايما بيبقى عندى أمل.

مصرية

شاهد أيضاً

الشبان الإيرانيون انتفضوا ضد نظام الملالى .. بقلم : عبدالرحمن مهابادي

يوم ٤ اكتوبر تقدم خامنئي بخطاب لمؤيديه مليئ بالتباهي بالقدرة الزائفة والذي لا تذكرنا سوى ...