اليوم الأربعاء 19 سبتمبر 2018 - 11:09 مساءً
الرئيسية / مقالات / من خواطرى : غربله هم .. بقلم : منى حسن

من خواطرى : غربله هم .. بقلم : منى حسن

هو انا مش فاهمه حاجه, هو انا لما ابقى مبسوطه ولطيفه وبشوشه ودمى خفيف وفى وشى دايما ابتسامه, ده معناه انى معنديش مشاكل ولا شايله هموم ومسؤليات, او لما اكون تعبانه اطلع وجعى على إللى قدامى كإنه هو سبب المى..

ليه كل ماهو مرتبط بكل الاعباء والهموم والاوجاع مردوده بإن اكون كشره ووشى مكتئب وصوتى مكسور وان استعطف اللى قدامى, منها احاول اظهر إن انا تعبانه ومنها ان اعيش فى دور ان انا تعبانه واهو منها ابقى تعبانه بجد..

والغى خالص بإنى ممكن احس بإن اكون احسن وكويسه واعلى عن كل الحاجات دى بدرجه, وابص عليها من الناجيه الايجابيه

ده حتى المريض لما بيجيله زياره بينسى انه عيان, ده معناه الزاير ايجابيه زيارته بتخلى المريض بيبقى فى حاله مختلفه واحسن او ملهى عن الالم ومابيكونش متركز عليه ..فابيتخفف عنه وينطبق على الصديق لصديقه لو عنده مشكله جامده, حزين او محنه فظيعه..

ربننا بيدينا اوقات كتيره اوى فرص ان احنا ندى لنفسنا وقت ان نفصل من الضغوط اللى بنمر بيها, بس الجميل انك تدرك وتعلى درجه عن اللى انت فيه علشان تحس احسن وتتفهم وتحاول ان تتعامل مع موضوعك بوعى اكتر, وان ماكنتش حاتقدر حاتلاقى من يساعدك انك تسلم بيه بطريقه تساعد نفسيتك .. ودى اول درجه لتخطى المحنه..

الوضوح مع النفس مهم جدا , مش الهروب منها, و لو كل واحد مر بتجربه قفل على نفسه يبقى سجن حياته لان الحياه كلها تجارب مؤلمه وحلوه وغريبه ساعات, ودخولنا فيها هى من نكون غلشان نعرف نواجهه تقلبات الحياه

مش كل بنى آدم بشوش وبيضحك يبقى بنى آدم فاضى هايف او فشته عايمه زى مابيقولوا بالمصرى او مابتأثرش فيه حاجه اوماعندوش مشاكل او اى من التعليقات السلبيه فى الانطباع للبنى آدم.

ده مايمنعش ان فيه بشر بطبيعتهم اللى طبعه انطوئى,  واللى طبيعته فيها مسحه حزن, واللى مكتئب, والمستسلم.. طبعا دى بتأثر على طريقه الفكر والوعى والتحكم.. ولكن هى من الحاجات المهمه اوى ان البنى آدمين يقدروا انهم يخلقوا جواهم الروح البشوشه علشان يقدروا يتخطوا المحن الكتيره اللى بيعدوا بيها وخصوصا فى الزمن اللى احنا فيه ده

ان البنى آدم  عمره ما فكر قبل حٌكمه, ان ربنا وهبه قوه وملكه انه يقدر يوازن بين الامه و حياته ….. من نعم وفضل ربنا علينا انه ادانا العقل وادنا الحس, وساعات الحس بيبقى مؤلم جدا واشاراته للعقل بتخليه واقف مش قادر انه هو يتحرك ولا يفكر ولا يعمل اى حاجه من كتر المه.. ولكن بقوه العقل احيانا لتفهمه لمدى الوجع وكبر حجم الالم  بيبتدى اشارات تحكمه فى الالم بتقلليل شدته.

فى طرق كتير للمرح  لحب الحياه  وانك تقدر تعيش عيشه سويه تساعدك على تخطى الاوقات الصعبه فى حياتك.

الاحساس الداخلى بيتفاعل معاك فى تصرفاتك, لو انت ضحكت جواك بيضحك لو حزنت جواك حايحزن.. عود نفسك ان تغلب حزنك ماتستسلمش لالمك.. الروح بتتنفس والاحساس يمد ايده والقوه الذهنيه تتحكم وتوجهه لخروجك من محنتك..

وارجع افكر تانى واقول هو العمر فيه كام لحظه.. واذا باقى من اللحظه عمر, يبقى من باب اولى مواجهه نفسك ومثابرتك للتحدى لتخطى المحنه دى تستاهل لأاستعاده توازنك لحياتك لتعيشها بطبيعيه..

وتبقى محاوله

مصريه  

6 FEB. 2018

شاهد أيضاً

الجواب الأساسي للغز إيران .. بقلم: هدى مرشدي ـ كاتبة ايرانية

قبل ٥٣ عاما كان هناك عدة شبان مصممين في إيران قرروا تشكيل منظمة كانت في ...