اليوم الإثنين 22 أكتوبر 2018 - 5:08 مساءً
الرئيسية / مقالات / من خواطرى : حايلت نفسي .. بقلم : منى حسن

من خواطرى : حايلت نفسي .. بقلم : منى حسن

مسكت قلمى حاولت اكتب مقالتى لاقيت :نفسى بتقولى مش عارفه, مش قادره اكتب .. حاولت وفى الاخر قفلت ولملمت حالى واوراقى..

قلت عادى ساعات بيحصل كده, بلوك هى الكلمه,  وممكن سده نفس فى اوقات تانيه

بتحاور مع نفسى وبسألها مالك,  فيكى ايه, حاتطولى يعنى ولا ايه,  حكايتك ايه:

لاقيت نفسىٍ تعبت, مافيهاش نفَس ترد ومجهده,  وعملت مجهود معاها لحد مانكشتها, لانها دايما فى صفاء وسكون,  ولاقيتها محبطه ومش مبسوطه !!

يا ستى مالك, وايه الجديد ومالحقتش اكمل وفتحت فيه :  مش شايفه ان احنا بنسوء, نزلتى تعملى مشوار ساعه فضلتى 3 ساعات وفى الاخر لاغيتى معيادك .

:الوقت بقى مالوش اى قيمه , مهدر , حايكون فيه انتاج ازاى او انجاز, ولا البنى آدم نفسه قيمته فين,  ليه يحصل كده فيه او غيرى, ممكن واكيد كان فيه ناس مريضه وكبيره فى السن واطفال محبوسه فى الشارع وحتى من غير,  كل ده صعب مش مقبول بالنسبه لى ولفكرى واستعابى

:ده غير الشوارع اخلاقياتها بقت صعب, واختلط الحابل بالنابل , وكله بقه اسلوبه واحد شئ مرهق للاعصاب والودان

:سيبينى اهدى,  ما تسألينيش لان الكلام كتير , وفَضلت ادخل شرنقتى لانى مابحبش الطاقات السلبيه,  وللاسف الايام دى واحدثها, شعت طاقات سلبيه, كرهها..

بقيت مش عارفه احايل نفسى وهى عندها حق, خصوصا بعد السرقه اللى اتسرقتها وراح فيها حاجات غاليه وذكريات اغلى ومقتنيات حياه وعيله الخ الخ الخ.. وما أتاخدش اى موقف من مَن يحرسونى وامنين عليا..

   قوليلى اقدر اثق فى مين؟

يا ستى يهديكى يرضيكى ربنا يعوض عليكى, ايوه راضيه…  بس مش راضيه بفعل البشر ولا نفوسهم.

:الذمه والضمير والامانه اختفوا, المبدء اختلف, اتفاق الكلمه بيتبخر,  الناس بتقبل اى حاجه ويخلقوا اسباب علشان تعدى وتمشى الدنيا .. انا رافضه المبدء ده والطريقه دى

انا مش مختلفه معاكى,  بس احنا فى واقع وحياه وقتها صعب, صحيح حاحب اعمل اللى بيريحنى,  واختار من يكون حولى, واغربل بعيد عنى الضغوط اللى مالهاش لزمه, واملى حياتى بالرضا والسكينه والحب,  ولكن فى اوقات مش بايدى ولا بإيدك نقدر نتفادها فنحاول نخرج منها بسرعه علشان ماتدخلناش شرنقتك..

:صعب عليا ما بيجرى حواليا, ده حتى فضفتك لصاحب بقت تقليل شأن واستخفاف واداء واجب, مش نصيحه وشيل عبء, وملل يدب ونظره بارده تسقط سنين عمر فى اقل من جزء الثانيه.. حتى العشم  والعشره بتهون..

     قوليلى مين تقدرى تتسندى عليه دلوقتى؟

فين الجدعنه والشهامه والصاحب الأمين؟؟

يا ستى انتى جوايا وكيانى,  وفاهمه ان الواحد كل وقته بيعرف وبيتعلم وبيكتشف وله دور فى الحياه دى, فيها حلو ووحش وبتقابلى وتفارقى, واللى بتحبيه الزمن بيغيره,  واللى بتعرفيه بتكتشفيه ولو بعد حين, واللى ماتعرفهوش ماتلوميهوش هما لهم ملكوت .. انتى عارفه وشايفه ومدركه وسايباها وعايشه فى ملكوتك وسابحه فيه, فاشاغله نفسك بيه ليه..

:الحياه واحده, والظروف بتحطك فى طريقهم, ويومك بقى جزء من يومهم,  حتى لو فرض انك عايشه فى ملكوتِك وبتحاولى تبعدى, الموضوع بقى صعب, وانك تتجنبى على قد ما تقدرى بقى اصعب,  لان المسؤليات بتزيد, وضغوط الحياه بتقسو, والوقت بقى قليل, ونفوس الناس اتغيرت, وناس فارقت, وناس جديده دخلت على حياتنا..  فـــ هنوصل لنفس النتيجه

:احسن حاجه دخول شرنقتى, لانها هى العالم بتاعك, واوعى تقوليلى ده هروب, هى الامان هى السكينه هى راحه البال اللى عايشه بيه وهى الناس المختاره لحياتى هى شويه القوه اللى بجمعها علشان ادي ايجابيه

انا بتجنب الطاقه السلبيه الموجوده اللى بدءت تاخد منهج حياه.. لانها ابتدت تأثر على تعامل الناس وتفاعلهم معها, وعلى تصرفاتهم مع بعض, وعلى احاسيسهم, على الضحكه, على الفكر, على المجتمع

الطاقه السلبيه بقت صعبه اوى, مع ان كل الناس بقت بتتكلم عن الطاقه الايجابيه, انما اللى شيفاه ده طاقه سلبيه

اللى بيحب بجد بيدى طاقه ايجابيه انما لو هو بيقول اه بحب وهو من جوه مابيحبش حايشع طاقه سلبيه

 اللى بيعمل حاجه كويسه بيدى طاقه ايجابيه, انما اللى بيعمل الحاجه لمجرد انه مستنى مردود مع الوقت حاتتحول لطاقه سلبيه

 اللى بيحن على حد وجواه خير ومسامحه بيدى طاقه ايجابيه, انما اللى بيعملها للتباهى او لسبب من الاسباب قلبت طاقه سلبيه

الطاقه الإيجابيه تعم لو تعامل بالسماحه والرضا و العطاء لكل واحد بيختار هو عاوز ايه, او حتى لو اتفرض ووافق       عليه..

واضح إدراك الطاقه السلبيه والايجابيه مختلطين فى طريقه العطاء والتعامل  والحب و مردودهم فى الحياه مؤثر و الغريب مابتتغيرش السلوكيات!

بالنسبه لى الحياه ابسط من كده, وده من الاسباب اللى بعدتنى عن من يشع طاقه سلبيه,  وهو مصطلح نسبى بالنسبه لناس كتير وجديد,

 بس احنا كنا عارفينه من زمان بأسامى تانيه زى نكد وكِشر وحشرى وكداب, بخيل, رزل ودمه تقيل, افاق, نصاب,         وصولى , مصلحجى وغيرهم كتير لان دى تشع سلبيات..

اضحك حب تعامل افرح, ادي العطاء العطاء العطاء, انجاز حاجه بتحبها, اعمل حاجه لغيرك, ساعد, اجبر خاطر حد, اغفر, انجز, انتج, خليك امين … كل دول حاجات ايجابيه..

كده عرفت انى صالحت نفسى, وضحكِتها  رجعت, وابتدى يدب فيها الحياه, الحب, العطاء, الفرح..

:بس سابحه لسه فى مالكوتي

مصريه

9  March 2018

شاهد أيضاً

العمال الإيرانيون ضحايا نظام الملالي .. بقلم : هدى مرشدي- كاتبة ايرانية

العمال الإيرانيون هم من الطبقات الإيرانية المحرومة والمظلومة التي ازدادت ظروفهم سوءا عاما بعد عام ...