اليوم الأربعاء 17 أكتوبر 2018 - 10:47 مساءً
الرئيسية / مقالات / من خواطرى : نعمه من السما ..  بقلم : منى حسن

من خواطرى : نعمه من السما ..  بقلم : منى حسن

من غيرك كنت حاعمل ايه.. او مبسوطه انك دخلت حياتى.. او انت جيتلى من السما!!

كلمات سهله القول, لكن لما بتتقال معناها كبير اوى, مابتتقالش الا لو حد بيعنيها بجد….

بتتقال لكبير صغير, صاحب حبيب, اخ  جوز, وممكن يكون شغال, عامل واحيانا حد ماتعرفوش, ممكن تتقال فى اى وقت او موقف,  لاى فئه ومستوى.. واكيد بتتقال على حسب الموقف والظرف والطريقه!

الكلمه دى ممكن تكون عمر او تكون وقتيه,  وساعات لحظيه بمعنى وقت الموقف, ولكن وقع الكلمه من الكلمات اللى بتعلم جوه الواحد..

البنى آدم فى طريق حياته,  كتير ماشى وبيلاقى نفسه اتحط فى موقف مابيعرفش يتصرف ويتعامل فيه لوحده, فبيظهر فجأه له حد احيانا يبقى غير متوقع  واخرى متوقع لمساعدته فى الموقف ده, ويكون هو الجندى المعنى للوقت ده للمسانده, وفى وجهه اخرى ممكن دخول حد حياه شخص يشرق حياته فيضيف لها بهجه وهدف ويملاءها حب فتكون بوقعها الإيجابى له طوق نجاه لحياه افضل..

المواقف كتير واشكالها اكتر, لان منها فى العموم ومنها شخصى وفى اى حال بتكون لها تأثير مهم ورد فعل ايجابى على حياه البنى آدم.

ببساطه يترجم الكلام بدرجه شكرنيتك وتقديرك للمسانده او انجاز المطلوب او من جاء لمساعدتك فى وقت حرج كنت محتاج فيه لمساعده.. وده اكيد يبقى من حظك

اوقات كتير باشوف ان من يساعد حد او يقف بجانبه او يرعى مصالحه او من يتحمل مسؤليه الخ الخ..  بيأخذ كأمر مسلم بيه كإن هى دى وظيفته والمفروضه عليه وان هو ده اللى لازم يقوم بيه ومايقصرش .. والعجيب انه مايسلمش لو قصر فى اى من اداءه,, مع انه مش ملزم ولا يجوز استغلاله  لانه متطوع فى معظم الاحيان

كل واحد جواه حته ضعيفه هشه, مابتظهرش غير تحت ظرف معين وبتخليه يراجع حساباته مع نفسه.. فى ناس مراجعه النفس عندها صادقه وتقدر تتعامل بها, وناس تستخدمها وبتحللها لمصلحه ذاته, واخرى كبريائه يمنعه, وغيره يعتبره حق مكتسب او يطنش اساسا كانه لم يحدث..

مد ايد المساعده ده فى حد ذاته نعمه من عند ربنا, لا يسوء استعمالها, صاحبها مابيفكرش غير فى المساعده او اشكالها,  وبيخرج عن طريقه لراحتك ومعونتك ولا يستغل صاحبه, وفى احوال كتيره مايكونش مستنى مردود..

انت عارف يعنى ايه تلغى او تتناسى اوتتجاهل من ساندك او خدمك او وقف جنبك وساعدك او فرحك وشال عنك هم او دمعه ولو حتى بكلمه.. انك اذيت نفسك ومعيارك قل

علما احساس ان تقدر البنى آدم اللى ادامك ده يمدك بقوه داخليه وسكينه ممزوجه باحساس جميل بالعرفان واحيانا الحب والعطاء على حسب مين والموقف..

هو احساس محسوس من وراء ستار الاحساس بالامان والاحسان, احساس جميل يملائك دفء وثقه وقوه وحب وموده للطرفين .. خصوصاً

وانت فعلا تكون محتاج نعمه مد ايده ليك ومعونته

واحلى مافيها من غيرك كنت حاعمل ايه!

مصريه

18  March 2018

شاهد أيضاً

الشبان الإيرانيون انتفضوا ضد نظام الملالى .. بقلم : عبدالرحمن مهابادي

يوم ٤ اكتوبر تقدم خامنئي بخطاب لمؤيديه مليئ بالتباهي بالقدرة الزائفة والذي لا تذكرنا سوى ...