اليوم الأربعاء 12 ديسمبر 2018 - 7:34 صباحًا
الرئيسية / مقالات / من خواطرى: الوصول.. سراب ..بقلم : منى حسن

من خواطرى: الوصول.. سراب ..بقلم : منى حسن

موضوع بيكون مهم ويفرق فى حياة اى بنى ادم, مش بتضخيم الكلمة ولكن بالمعنى,
هيئة البريد المصرية عندى حكاية الحقيقه هما اتنين .. تجريتين للأسف الشديد فيهم خيبة أمل كبيرة اوى من قلة الاهتمام والاستهتار وحاجات كتيرة مش عارفة حتى أعبر عنها..
كان عندى موضوع مهم للأسف الشديد كانت نتايجه انى خسرت حاجة مهمة جدا فى حياتى, كان عندى التزام لجهة بورق مهم والورق ده اخد منى مجهود جامد علشان خاطر أخلصه وعلشان اقدر ابعته تانى فى توقيت المطلوب, وفعلا
أنا انجزت وبعته وقالوا لى انه فيه خدمة تبع البريد بيعملوا بريد سريع بنفس مستوى ارامكس و DHL
الحقيقة صدقتهم, وقلت انا اضمن ابعت الحاجات دى وحتوصل فى خلال 3 ايام او 4 ايام وبعت الجواب والى يومنا هذا لم يصل الجواب وعمل لى مشكلة كبيرة على المستوى الشخصى وعلى المستوى المهنى, وحايكلفنى كتير علشان اقدر اتابعه وارجعه لمساره الصح والى هذه اللحظة الموضوع معلق معاهم والجواب موصلش,
ولما تابعت قالوا لى انه وصل وبعتولى فعليا بوصوله والجهه الاخرى تاكد انه ماوصلش للبلد اللى المفروض يوصلها الجواب … واضح تماما ان فيه اهمال شديد وعدم متابعة ..
المهم مر أحد الأصدقاء بتجربة مشابهة والتجربة دى كانت بخصوص جنسيته في بلد تانية وكان المفروض أنه يعمل اوراق فاضطر انه ييجى مصر علشان يعملها بعد كفاح مرير مع الروتين والتعامل اللى من كلمة ممكن يقعدك فيها شهور مجرد انه مش عايز يتعب نفسه الموظف .. العادى بتاع الروتين, خلص الورق وكان المفروض انه يتبعت فاختاروا برضه انه يتبعت عن طريق خدمة البريد السريع, وللأسف الجواب موصلش لهذه اللحظة والموضوع كان حيكلفه جنسيته غير مبالغ طبعاً غرامة والخ الخ … وخلص الموضوع عن طريق جهات رسمية بطريقة أخرى ….
المشكلة الكبيرة مش كل الحكاوى بتاعتنا واكيد ناس تانيه.. المشكلة لـيه!!
لــيه مابنعملش شغلنا صح, انا فى الموقع ده علشان انجز خدمة المواطن ليه أعمل له مشاكل, ليه اعرقل له طريقه, ليه ابوظ شغله, ليه اخرب حياته, ليه اعمل كده!!
الراجل او الست دى اعتمدوا عليا واستأمنوا الموقع بتاعى بانى اخلص و اسهل شغلهم ليه اعرقله, ليه اخرب الحياة بتاعته, ليه ادمر وقته واعصابه وفكره فى ان اضيع جوابه والمجهود اللى اخده فى ايام واسابيع انه ينجزه, وانا فى لحظة ابوظه او اضيعه او افقده.. ليه الاستهتار بالمواطن, ليه الاستهتار بوقته وبقيمة اللى بيعمله, حتى لو كانت ورقة فاضية باعتها فى جواب هو مالوش دعوه غير انه يعمل شغله صح, كون ان انا وصلت لحد عنده فأنا عندى طلب منه انه يعملهولى, واخد اجر عليه كمان, الأجر ده بيدفع له ومرتب ومرتب المنظمة بتاعته كلها هو لازم يخدمنى بيه, مش بس يخدمنى, لا ده هو لازم يعمل واجبه كمان طالما انه اختار يكون فى الموقع ده, لازم يعمل شغله بذمة وضمير بصرف النظر هو واخد كام عليها ….
مفهوم المبدأ مش فلوس ماهيه اخر الشهر, المبدأ هو ضمير والتزام ومسؤليه واعتناء واعطاء الشغل والعمل حقه, ولكن للاسف المبدا مخلتف وهو ده حالنا علشان كده التقدم فى حياتنا لازم يبتدى من البنى ادم, الانجازات القوية اللى بتحصل مش حاتقوم الا لو البنى ادم اتغير..
التغيير من الشخص الأول, هل هو عنده استعداد انه يتغير للحياة الأفضل… لان ولا مية حملة تنجح .. وكل دى حملات مش مجديه, ولو كان حايكون بنسب بسيطة هى اللى شغالة, لكن الكم الأكبر من المجتمع للأسف الشديد ثقافته مش موجودة, لا للأعتناء ولا للنظافة ولا للعطاء ولا للضمير الحى ولا الالتزام والمسؤليه, ولا لدورى فى الحياة لان كل واحد ليه دور, وان لما اخد موقع لازم اشتغل للموقع نفسه وخدمتة, مش ان اروح واخلص مصالحى او اروح اعمل شغلى متضرر وباستهتار واقضى الكام ساعه بتوعى واروح, ولا نص الوقت اكون باكل والا بأصلي والا باعمل اى كلام على الموبايل, او باكلم زميلى ولا اللى جنبه والا اخد يوم عارضه ويوم مرضى …
في حاجة اسمها الالتزام, الإلتزام مع النفس الأول, قبل ما اعمل اى حاجة ابقى عارفة ان انا داخله علشان اعمل شغلى.. الامانه الشرف العمل المسئولية الاحترام.. احترام الاخر والتقدير .. حاجات كتيرة اوى ناقصة فى ثقافة البنى آدم ماتطلبوش حاجة للتقدم وهى اصلا مش موجودة… ثقفوا الناس اعملولهم دورات تدريبية, بثوا فى الاعلام ازاى يحسنوا من ثقافتهم, ساعدوهم انهم يعرفوا, يعرفوا الأول, يتعلموا الأول, تدخل جوه دورة حياتهم الأول, من نشأ الطفل لحد الكبار دلوقتى وبعدين تعالوا حاسبوهم هما ماعندهمش كل الكلام ده….
العتاب حتى اللى انا باقوله, حتى اللى انا كتباه, فاقد الشئ لا يعطيه, هما مش مدركين الكلام ده, ولكن ده مش عذر فى موضوعى لان عندهم سيستم ومنظومة كان لازم يتعاملوا بيها, كان لازم يتابعوا بيها كان لازم يعرفوا هما بيشتغلوا ازاى, حتى المستجد فى الشغل لما يدخل في منظومه حيعرف لأنه بيعرف يقرا.. *المستلم .. الجهة .البلد.. الاستلام فى الجهه الاخرى*..
للأسف الشديد مفيش وصول سالم, وغالبا حايكون عندهم شكاوى كتير خسارة …
انا مش حاقول ان انا مش محبطة ولكن لسه عندى أمل, معرفش ازاى بس عندى امل, عاوزة حياة أفضل..
بلدنا جميله وناسها عايزة شوية اعتناء والتزام واحترام, باكيدج كده على بعضه بشويه توليفه علشان تقدر تقف تانى..
حاقول تانى خسارة و زعلانه
مصرية
16 November 2018

شاهد أيضاً

من خواطرى : إنهيار لوحه .. بقلم : منى حسن

بأعتبر الحياة لوحة جميلة مرسومة بنقاء وحب ووضوح وخطوط واضحة والوان متجانسة .. لوحة كل ...