الرئيسية / مقالات / من خواطرى : دقه اجراس .. بقلم : منى حسن

من خواطرى : دقه اجراس .. بقلم : منى حسن

من زمان ومن انا صغيرة بأحب وقت الكريسماس, وقت الكريسماس بالنسبة لى اصحى الاقى هديه جنبى,  أجازة طويلة وهدايا كتير وعلب صغيرة وكبيرة وورق هدايا, زينة, وشجرة وأنوار, ومزيكا وضحكه وناس كتيرة رايحة جاية …

جو الكريسماس تحس دايما إن فيه حب إن فيه ضحك.. إحنا كنا نطلع نلعب ولاد مع بعضها, ونستنى الأجازة علشان كلنا حانتجمع سوا, وأهالينا كلها بتتجمع مع بعض, وكل يوم في بيت بنتجمع بنتغدا بنتعشى, لحد ما ييجى يوم العشا بتاع الكريسماس بنتجمع على ترابيزة كبيره فيها ما لذ وطاب.. ولما كبرت كمان مع اصحابي في بيتى في بيوتهم بنتعشى.. دايما عشا ولمه حلوه عشا عائلى جو لطيف.. وراس السنه بيبقى جو لطيف ليله جميلة ومع عد تنازلى للساعة بيبقى احلى وقت لبداية جديدة…

كبرت فى جو مافيهوش فرق ولا مهم مين دينه إيه, كبرت فى جو مافيهوش فرق علاقتك مع ربنا ازاى اصلاً, لانه شخصى,  كبرت في جو فيه تعاملات جميلة وتناغم مع بعض, كبرت في جو نحتفل بالعيد وكل الأعياد زى بعض, عمرى ما فكرت فرق الأعياد ايه..

بالنسبة لى أى بيت عبادة روحانيات معناها فى أى مكان تكون ودى علاقة مباشرة مع ربنا,  الحيطان والمكان مالوش أى صلة وتأثر, انما علاقتك هى روحانية مع الله, وروحانياتك معناها فى أى مكان تكون..

باحب  صوت اجراس الكنيسه وباسمعه كل يوم جمعه واي يوم بتدق وباستناه, وباستنى اسمع الترانيم والصلاة بتاعة راس السنة والكرنفالات والكارولز والترانيم بتاعة الكريسماس, وباحب اسمع الآذان وترتيل والقرآن والتواشيح وبأحب اولع شمعه في كل كنيسة اقابلها بره مصر وجوها..

ومش شايفة ان ده شيء يأثر على أى حاجة فى شخصى ولا فى حياتى ولا فى معتقداتى ولا عباداتى  ولا فى اسلوب عيشتى ولا يحد فى تعاملاتى مع حد, واللى بيفكر بطرق مختلفة عن ده عنده مشاكل, حاتكون يا مشاكل ثقافية يا مشاكل وضغوط بطريقة او بأخرى و نشأ واترعرع وعاش بيها وغرق فيها, دى مَاشكلوه أنا مليش دعوه بيها هو حر, كل واحد عاش بطريقة معتقدات واسلوب..

انما انا بالنسبة لى انا شايفة الحياة ابسط من كده بكتير والتعامل في الحياة بالنسبة لى بالطريقة دى سلس, لأن مافيهوش اى نوع من انك بتفرق بنى ادم عن بنى ادم أو إنك إنت بتميز, لأن أنا مابفكرش ولا بأميز مين عيده ايه ولا هو ايه!

هو كده نظام روتين حياتى حتى لو سافرت والا رحت أى مكان..

حأدخل برضه واولع شمعه واسمع لو فيه ترانيم وادعى.. وحياتى دايما ماشية بالمنطق ده, وبأتلكك زى اى حد بيحب يتكلكك ويتبسط ويحتفل بالأعياد, وشخصيا بأحتفل بعيد ميلادى طول الشهر زى احتفال ديسمبر شهر الكريسماس بطول الشهر..

وفى نظرى ابسط حاجة وانها جميله في الحياة انك تعيش بسيط, خد الحياة من منظور التعاملات الانسانية, متخلطهاش بأى حاجة تانيه,  لأن ده مش من حقك انك تحم على حد, وانت ماخترتش تكون ايه او انت بقيت ولا غيرك ايه, فبالتالى اتعامل مع اخوك الانسان زى ما هو..

ودى احلى حاجة يا مصريين حبكم لبعض هو السر..

ما تخلوش حاجة تفرقنا,  اتبسطوا بالأعياد وغنوا واتمنوا

السنة الجديدة على وشك البداية  وإن شاء الله تكون سنة حلوة …

كل سنة وانتوا طيبين

مصرية

28 December 2018

شاهد أيضاً

من خواطرى : بلورة حياة .. بقلم : منى حسن

تعرف يعنى إيه إتولدت من جديد .. وإنت فى السن ده وبأتولد من جديد …. ...