الرئيسية / مقالات / من خواطرى : رنة كلاكس .. بقلم : منى حسن

من خواطرى : رنة كلاكس .. بقلم : منى حسن

من الحاجات النوادر اللى حصلت قريب ورجعتنى لما كنا زمان واحنا صغيرين,   الكلاكسات بتاعة العربيات

هى كانت لغة الحوار بتاعتنا, ممكن انك كنت بتعاكس حد برنه معينة, كنت بتهزأ حد رنه معينة, فيه بينك وبين أصحابك رنه معينه من الكلاكسات يعرفوا انك انت موجود وكان فى تعبير عن الحب بالكلاكس.

طبعا ده مش موجود دلوقتى أو اللغة دى مش موجودة في الجيل ده أو فى الزمن ده..

فهل ده لما يحصل دلوقتى هل حيكون اللى عمل حاجة زى كده او اللى مشى  يضرب كلاكس فى الشارع بالرنة دى حايكون حد من زمانا بيحب حد من زمانا برضه,  فبيظهر لها الحب ده ..

حاولت اسأل الشباب فيه منهم قالى شويه اه وكتير لأ احنا مبنعملش كده, مش محتاجين طبعا لأن السوشيال ميديا بالنسبة لهم هى دى الحياة,

حأحب بزرار  “وأدلت as delete” حبيبى أو اللى كان تعرفه بزرار وانتهينا على كده وادخل على بيدج جديدة,,

إنما إحنا كان عندنا تقطيع وحب وغرام واغانى ويتبعت ورد وكروت وجوابات وكلاكسات وآهات وحاجات كتيرة اوى.. الأغنية كان ليها معنى ,الكلاكس كان له معنى, الورده كان ليها معنى, الهدية كان ليها معنى ,النظرة والابتسامة كان ليها معنى ولمسة الأيد كان ليها معنى..

جو الرومانس في حد ذاته كان له معنى.. محدش بيعيش الرومانس ده دلوقتى حتى من زمنا.. ريتم الحياة اتغير مع ان ده حاجة لطيفة اوى وجميلة اوى وبتحيى حاجات جميلة فى المشاعر الانسانية  وبتدى دفعه كمان جميلة لتكملة بقية حياتك..

من الجميل في الحياة إنك تلاقى الحب وتعرف تقدره ومن احلى الحاجات انك, انت تفهم اللى قدامك من غير ما يتكلم من غير ما يشرح نفسه علشان لغة الحوار فى الحب من احلى الاحاسيس اللى لها تأثير السحر على اللى بيحب, وبتخليك فى حالة دايما انك مش على الأرض ولكنك على الارض,  بتخليك دايما تتقبل حاجات كتيرة اوى وانت فى نفس الوقت بتعمل لها تقييم كويس فبتعرف تاخد قراراتك بطريقة او بأخرى لأن فى جزئية فى حياتك مكتمله .

مهم أوى اننا نعمل توازن فى حياتنا ونعرف احنا واقفين ازاى وبنتعامل ازاى ومين فى حياتنا لأن اللى في حياتنا لو إنه مإداناش قوة ايجابية يبقى تقييمه و وجوده غلط جوه حياتنا, لازم اللى يخش جوه حياتى يقدر وجودى فى حياته ويحط الابتسامة ويدينى قوة ايجابية ويسحب منى القوة السلبية ويبعدها بعيد,  وهو اصلا كمان حاتنعكس عليه القوة الايجابية دى, فى الحالة دى سواء صاحب حبيب قريب معرفة مهم اوى يكون التعامل بالمنظر ده.

الايجابية فى التعامل بالحب شىء نقى جدا, مش لازم الحب تبقى علاقة بين راجل وست,  ولكن معنى الحب انه يكون بينهم خط مفتوح والتواصل ده يكون فيه عطاء وفيه تعاملات حلوة تخلى الحياة اللى ما بين الاتنين دول فيها راحه وتناغم وصدق, وزى ما قلت مش شرط يكون حبيب ممكن يكون معرفة وزميل في شغل و صاحب واشكال كتيرة حتى تعاملاتك مع البايع ممكن يكون الراجل ده انت بتعزه فبتشترى منه كل يوم, مش عايزة اقول تعاطف لأن مش عايزة كلمة تعاطف تدخل فى الحب,  وده لأن دلوقتى الناس بقت تستعمل كلمة تعاطف للوصول لحاجات كتيرة اوى وده مش صح, احنا يهمنا انه يكون بينا وبين بعض اساس مظبوط, التعاطف ده حاجة تانية خالص ملهاش دعوه بأنى انا بابقى مبسوطة ان انا شفتك او ان انا بحبك او ان انا بينى وبينك عطاء او ان انا بينى وبينك جدعنه او ان انا بينى وبينك انشالله كلمة صباح الخير..

وبرضه حارجع تانى لرنة الكلاكس اللى انا سمعتها ورجعتنى لأيام زمان اوى اوى اوى ومليتنى مرح وخلت على وشى ابتسامة جميلة ابتسامة تمحى وتساعدك على حاجات كتيرة اوى مع انى انا ضد الكلاكسات ورافضاها ومش حاقبلها ولو حصلت تانى حأزعل جدا, ولكن كان كلاكس بحبك بحبك كان بالنسبة لى ابتسامة وذكريات زمان.

مصرية

3 January 2019

شاهد أيضاً

من خواطرى : صحبتى وانا والتعايش  .. بقلم : منـى حسـن

البنت لصاحبتها :  بقولك إيه قريت مقاله النهارده عن أن الإنسان بيغرق لما بيقاوم صاحبتها: ...