الرئيسية / مقالات / من خواطرى : بدون إمضاء.. بقلم : منى حسن

من خواطرى : بدون إمضاء.. بقلم : منى حسن

محدش ينكر إن الورد وتكوينه شئ مذهل, وان لغة الورد أجمل, وإن ترتيب الورد مع بعض ده فن, وعمايل بوكيه ورد واهداؤه حاجة لطيفة جدا, وبتبقى هدية جميلة لأن هدية بوكيه الورد بتبقى ليها معانى ولغه خاصه فى اوقات كتير, وبتبقى لطيفة أوى مليانه ذوق ورقة مشاعر,  وممكن يترجم بإختيار لون الورد ونوعه الورد, وفى وقت تانى بيكون إهداء جميل فى المناسبات..

الورد عموما بيكون فى المناسبات له معنى خاص واحساس دافى, اول ما بيجيلك بوكيه ورد بتبقى مبسوط به أوى, فيه اللى بيبقى محتاج يترتب ويتحط فى ميه وفيه اللى بيبقى جاهز ومحتاج إعتنا كل شوية..

بوكيه الورد اللى باتكلم عنه انا محتاره منه ومحتاره بيه,  بوكيه جميل أوى فيه ورود بيضا مليانه صفاء وورود موف فاتح مليانه روحانيات, وروز واحمر ومتغلف كله بأخضارات وعليه شريطة صفرا جميله بمعناها المستتر, ومعايدة من غير امضاء..

إتسلم البوكيه من غير ما يتقال من مين .. تحتار فى مين وإلا مين! ومين ممكن يكون بعتلك البوكيه,  ولو فكرت تكلم وتسأل حتقول ايه وميكونش هو الرد!!

ومش معقول حتشوف حد حايبعت وجايز, ويبقى محرج يقول انا… فــبوكيه الورد جاى من غير اسم ولا إمضاء, مكتوب لمين بس بكلمتين اهداء,  كلام رقيق ولكن يخليك تفكر مين صاحب البوكيه ..

فكره بتيجى وتروح فى دماغك, وحد يلوح ويروح من دماغك, وفى نفس الوقت تقول ده قريب والا بعيد والا غريب..

ان كان قريب ليه بدون امضاء, وان كان بعيد اكيد حيكون تعريف فيه مع الاهداء, ولو كان غريب احسن له يكون فى إمضاء …

محير انت يا بوكيه الورد …

ولكن فى الآخر حانقول من  أحلى حاجة وأحلى لغة وأحلى هدية هى بوكيه الورد مش مهم مين بس كان يبقى لطيف لو مكنش بدون امضاء.

مصرية

منى حسن

16 January 2019

شاهد أيضاً

من خواطـرى : البعد المجهول .. بقلم : مــنى حــسن

  بقى لى فترة محتارة ومش قادرة اكتب وعندى بما يسمى  (Writer’s Block) حاسه كأن ...