الرئيسية / مقالات / من خواطـرى : البعد المجهول .. بقلم : مــنى حــسن

من خواطـرى : البعد المجهول .. بقلم : مــنى حــسن

 

بقى لى فترة محتارة ومش قادرة اكتب وعندى بما يسمى

 (Writer’s Block) حاسه كأن فى ضغوط منملانى مش عارفه افنطها فإحساس كأن دماغى فاضية… 

وكالعادة شاغلنى إيه اللى بيجرى فينا, واللى بيجرى فيا بالأخص, فى العادى دايما عندى قوة ايجابية عطاءة ملهاش حد, ملهاش فرامل, تحول كل حاجة سلبية لحاجة ايجابية علشان أقدر أخرج منها حاجة بناءة..

تعاملاتى مع ناس كتير وبسفرى واندماجى فى ثقافات تانية مخلية فكرى مش قادر يركز على الغلط ايه, ايه هو الغلط..

 كل حاجة بطريقة أو بأخرى فيها حاجة غلط, التعاملات بقى كلها غلط, الإحترام بقى كله مش مظبوط, الحب مفاهيمه اتغيرت, الأحاسيس بقت بارده, المصالح بقت عميا البشر, الود والرحمة بقى مفتعل وبقى زياده عن الوضع الطبيعى بتاعه, الضغوط على البنى آدمين بقت بكل المقاييس قوية وبالذات فى مجتمعنا, ماشى كأنك شايل حمل ده مش على ضهرك بس ده كمان جوه دماغك, تشوف ثقافة شعوب تانية تلاقيهم عايشين عيشة طبيعية ولكن عندهم نفس اللى عندك بس بدرجات كتيرة جدا أقل, مع انهم بيعانوا بنفس المعاناة بس واخدينها بالطريقة الطبيعية اللى هى التدرج الطبيعى للتغير ولكن بنفس مقاييس, بمعنى الإحترام له احترامه والتعامل له التعامل والحب له معناه, والود هو هو, والاحتياج واللى انت عارفه فى حدوده وبأدب, ايه اللى بيحصل ايه اللى جرى ايه اللى الموجود في الدنيا ده..

 حأقعد أقول الانترنت والتواصل الاجتماعى اللى بوظ الدماغ واللى بوظ بيوت وبوظ شغل واللى بوظ شباب واللى بوظ جيل واللى بوظ واللى بوظ, مش حأقدر أقول كتير في الموضوع ده لأنه خلاص بقى واضح وبقى واقع وللاسف الشديد الناس مابتحاولش ان هى توقفه, وتقف واقفه جامده بحث انها تظبط حياتها, واخداه كأمر مسلم به وجزء من حياتها, وهو بقى جزء واقع حقيقى, ولكن تدويره هو المهم فى حياة البنى آدم, استعماله ازاى وبتعمل به ايه..

 النهارده اللى بيحب حد بيقفل التليفون بعد مكالمه, وممكن يكلم حد تانى ويبقى بيحبه برضه, الشيفت مبقاش فيه احساس بجد بقى تعامل آله بقى تعامل شاشه مابقاش تعامل بنى آدمين .. البنى آدم بقى بيشوف البنى آدم إذا كان هو مرتبط بيه ولكن بزرار بقى ممكن يلغى حياته معاه … 

الحياة بقت غريبة جدا إنت بتخش شغل بتقعد تشتغل فيه, بعد شوية تلاقيهم جابوا واحد تانى علشان أكتر كفاءة منك فامبقاش عندك استقرار .. او البنى آدم اللى عنده خبره أكتر من المطلوبفى نظر الشغل فيستبدلوه باتنين اقل خبره ايه الحياة دى!!

ليه بتموتوا بنى آدمين ليه بتلغوا بنى آدمين ليه بتأذوا بنى آدمين,  البشر بقى يأذى بشر!! مبقاش حاجة ليها قيمة.. مافيش قيمة!!

 اكتشفت او احتمال من وجهة نظرى كأننا دخلنا فى بعد تانى, احنا كده كلنا حصل لنا شيفت (نقلة) في بعد تانى

*Another diminution*    حانسميه بقى بعد تانى, بعد تالت, بعد خامس, مايهمنيش المسمى…

 انما احنا دخلنا فى بعد تانى, و ده صعب جدا بالفكر وبالغوص الفظيع اللى دخل فيه البنى آدمين سواء من زمانا أو الزمن اللى عاشينوه والجيل الموجود ده انه يتغير, الا لو هو عايز يغير من نفسه..

المنظومة فيها خلل واضح, كل واحد بيقول احنا مالنا احنا اتغيرنا انما مبياخدش موقف, ومابيقفش ويقول انا حأتعامل كده, واللى بياخد موقف يقولك طب ما أنا حاداس, تداس يعنى ايه!! هو انك انت تحاول ده ضعف, بقى بنى آدمين دلوقتى اللى بيحاولوا والبنى آدمين اللى بتتعامل بقلب كويس وبتتعامل بصفاء وبتتعامل بإحترام بقت هى دى البنى آدمين الضعيفة!!

في مقوله بتفول نام مظلوم على انك تنام ظالم ( مثل شعبي بيقول يا بخت من بات مظلوم ولا بات ظالم ) 

بس ده مش معناه ضعف ده معناه قوة واحترام لنفسك واحترام للى قدامك.

  الإنجاز فى اى موضوع ومردوده بيبتدى من نفسك, قبل ما تعمل اى قرار في حياتك فكر في غلطك, فكر انت عملت ايه بس بأمانة, مواجهة النفس والوصول للحق مع نفسك بمعنى اللى مارضاهوش لنفسى مارضاهوش لغيرى حيوصلك لنقطة مهمة أوى دى مش يوتوبيا,  ولكن هو ده الزمن اللى كان موجود وهو ده الزمن الصح وهو ده البعد اللى احنا طلعنا منه, بعدنا كان فيه مسؤولية بعدنا كان فيه احترام, بعدنا كان فيه اصول تعامل, لو فرض ان البعد اتغير وبقى بعد تانى, ولسه فيه بنى آدمين عندها أصول من البعد القديم, لازم يحاولوا يبثوها فى الناس علشان البعد ده وحش أوى, وأتمنى مكونش موجوده فيه, لأنه فيه أذى جامد جدا أذى على الروح, وأذى على النفس, وأذى على التعامل, وأذى على الفكر, وأذى على البشر, وأذى على الدنيا, واذى على المجتمع, واذى على العالم كله..

 أنا شفته عندنا قوته أكتر 100 مره اقوى من بلاد تانية مع ان هما تعداد سكانهم قدنا ويمكن أكتر مننا, انما لسه فيه بنى آدمين عندها بعد قديم ولسه البنى آدمين اللى عندها بعد قديم بتحاول تعلمه للبعد الجديد, احنا ليه مانحاولش أكيد في ناس كتير زهقانة من البعد الجديد, وانا متأكده إن فيه من الجيل الجديد اتربى واتشرب من البعد القديم ونفسه ان الجيل بتاعه يبقى واخد كده, ليه مانحاولش ترجع تانى زى زمان مش حأقول بنسبة ميه فى الميه  (100% ) بس على الأقل نحط 25%, والخمسة وعشرين فى الميه دى حاتفرق جامد … الـ 25% دى اللى قاعد فى القهوة حيقدر يطلع يعمل حاجة ان شاالله يجيب لقمة عيشه بتاعة اليوم, بدل ما هو بيفكر بسلبيه, أو بيندب على حظه ما إحنا موراناش حاجة, الجو العام بقى مليان سلبية وأسهل حاجة ياخد له حباية والجيل اللى أكبر منه الزمن وجعه, فخلقه ضاق فلا مستحمل حد من جيله ولا مستحمل يعلم الجيل بعده اللى محتاج له.. 

أنا مابقتش فاهمة هل الناس بقت وحشة أوى, والا الظروف خلت الناس وحشة أوى, والا هى الناس أصلا وحشة أوى وخلت الظروف هى اللى بقت وحشة أوى كده..

 وهل فيه أمل… ان الناس ترجع ناس!! 

 انا لسه عندى الأمل ده,  ولما نشوف آخرتها ايه فى البعد المجهول الجديد ده!! 

مصرية 

20 July 2019

شاهد أيضاً

شكرى رشدى يكتب : يحدث منذ خمسة آلاف عام

لم يرض الفلاح المصرى القديم بالظلم والنهب الواقع ضده من موظف الحكومة فى قريته فقرر ...