الرئيسية / مقالات / من خواطرى : ثقه على حسب الظروف .. بقلم : مــنى حــسن

من خواطرى : ثقه على حسب الظروف .. بقلم : مــنى حــسن

يا ترى كلمة ثـقـة دى لسه موجوده .. كلمة لسه الناس بتتعامل بيها, والا من الكلمات اللى بدأت تندثر وتتمحى, وإلا ابتدت  تتحور وتاخد شكل جديد من الاشكال اللى موجودة دلوقتى..

هى الثقة بقت تدخل فى ايه,  يعنى هى كانت زمان كلمة بتتقال بتساوى كلمة, وزنها قوى جداً,  أى حاجة تحت مسمى كلمة ثقة كان لها وزن, ولها احترام, يندرج جواها بقى كلام بنى آدمين أفعال, وعود, اتقان عمل, حاجات كتيرة أوى.. انما ثقة الايام دى بقت ايه! نيو لووك ثقة, وبقت الثقة ومشتقاتها, والا بقت الثقة بالسين, والا بقت سين وكاف و هـ  مربوطة علشان خدت لها سكة..

معروف الثقة دى من المقدسات, انما دلوقتى لو حد قالى كلامى ثقة  إعرف على طول انه مالوش فى المقدسات وميعرفش يعنى ايه ثقة..

الكلمة زمان كانت ثقة ووعد وأقوى من الورق, دلوقتى الورق بيضيع وبقى زراير, والثقة بقت نيو لوك, بقت لبسه فستان متزوقه, والحياة بقت حياة تانية..

الظروف بتلعب دور قوى في حياة البنى آدمين بس اللى عنده اساس واصول عمره ما بيخون الثقة, لأن اللى عنده اصول بيبقى عارف ايه معنى الكلمة وقوتها والتزمها, أما بقى اللى طالع على أساس مهزوز وما يفرقش معاه الكلمة بيكون مذبذب والمواقف هى اللى بتمشيه فده معندوش مبدء ولا  كلمه وميعرفش يعنى ايه ثقة, ممكن يكون بيتكلمها ما يعرفش يطبق كلامه بيقولها انما مش فاهم قوه معناها ويعنى ايه ثقة …

مايفهمش يعنى ايه بنى أدم بيثق فيه مايفهمش لما يقول كلام لازم يبقى كلامه له وزن ويلتزم بيه مايفهمش ان حياه بنى ادم ممكن تتاثر.. 

عيب الزمن اللى احنا فيه ان الثقة بقت مرجيحة بتمشى على حسب الظروف وبتمشى على حسب الأحداث وبتتغير مع انها طول عمرها كانت كلمه واحده وعلى رقبة اللى يقولها لان الثقه التزام واحترام ومسؤليه..

للأسف أنا واقفة فى حته تانية بأتفرج على أحداث كتيرة كأنه فيلم قدامى بيحصل وهو حلم أو كابوس وواضح انه مكمل ..

الثقة كانت زمان امان, الثقة كانت زمان سند, الثقة كانت زمان البنى آدم بياخد منها القوة, الثقة كانت زمان الواحد بينام مرتاح, الثقة زمان مكنش الواحد بيعد ورا حد, ولا بيوجع دماغه ولا بيشك ولا بيحسبها.

الثقة دى كانت من مفاتيح شخصية بنى آدم, فبما إن بقينا زمن او بعد مجهول واتنقلنا على بعد تانى فواضح ان المفاتيح خدت بعد تانى, فى حاجات كده اتسابت او اتنسيت  فى البعد القديم والزمن القديم اللى هى منها الكلمه والإلتزام والإحترام والتقدير, صحيح مهم أوى كان التقدير برضه, في حاجات كتير اوى مابقتش موجوده بقت منسية, يا حاجات بتتاخد كانها امر مسلم به, يعنى البنى آدمين بقت مغيبه كده مش معقوله وتكون معمية, ومش معقول بقت مابتحسش, ومش معقوله تكون بقت أنانية كده زيادة عن اللزوم, ان مايهمهاش غير نفسها وبس..

كل بنى آدم بقى يستحلى لنفسه ويبررها تحت مسمى كلام كتير, بقى شرا دماغ, على الواحد بيعيشها مره واحدة, او ضغوظ, كله كلام من هذا القبيل اللى مكنش موجود فى زمانا ..

كانت الثقة مسؤولية  وهو أصلا مابقاش فيه مسؤولية

فامبقاش فيه ولا ثقة ولا كلمة..

ده حتى فى اى مكان دلوقتى بتشترى الحاجة حاسس بحاجه مش مظبوطة, بتتعامل مع الناس وانت عارف ان الثقة اتهزت, بتشرب و بتاكل أكل وانت قلقان, وصلت لدرجة دلوقتى بقيت تبص للهلال وانت مش عارف هو ماشى مع اليوم والا لأ.. الثقة بقت ماشية على حسب الأحوال, مبقتش الثقة هى الأحوال .. وقعت ضاعت لازم نرجع ندور عليها!

خسارة بجد خساره علشان كده البنى آدم بيخسر نفسه قبل ما بيخسر اللى قدامه,  ده لو فهمها أصلاً

مصرية

5 August 2019

شاهد أيضاً

من خواطـرى : البعد المجهول .. بقلم : مــنى حــسن

  بقى لى فترة محتارة ومش قادرة اكتب وعندى بما يسمى  (Writer’s Block) حاسه كأن ...