اليوم الأحد 17 نوفمبر 2019 - 12:36 صباحًا
الرئيسية / مقالات / من خواطرى : لمونه فى بلد قرفانة .. بقلم : مــنى حــسن

من خواطرى : لمونه فى بلد قرفانة .. بقلم : مــنى حــسن

حلو التعبير بتاع لمونه فى بلد قرفانة, ده عنوان مقالتى اخترته من مقولة عجبتنى, واستأذنت صحبتها لكتابتى دى, بس مقصود توظيف الجمله كان لإيه ماعرفش.                      وجهه نظرى فى المقولة دى حاينطبق عليها ايه وهل الكلمة فى مكانها وفى محلها لما افلسفها واحللها برؤيتى وتفكيرى!!.. جايز : 

اللمونه دى إنت وأنا, والبلد اللى قرفانة هى برضه إنت وأنا.. البلد نفسها ملهاش ذنب علشان هى حدود وأرض وسما وشمس وقمر وبحرين ونيل ومبانى كتيرة  وشوارع واسعه وضيقه اوى وحوارى وأزقة وناس عماله بتكتر بتخنقها واهرمات وصحرا بيضا وصحرا واسعه حواليها سعرها بيزيد بجنون, وهى جزء من ارض جوه حدودها, لا عارف اللى عايش فيها يروح يعمر ويسكن فيها ولا قادر يبعد عن زحمتها.. 

اللطيف فى المقوله بنظرتى, ان اللمونه هى اللى قرفانة, ولأنها أنا وأنت فى نفس الوقت هى اللى بتحاول تعيش علشان تبقى لمونه..

اللمون فى حد ذاته هو مضاد للأكسده أو من مفعوله بيموت وبيقضى على الحاجات الوحشة ومطهر قوى.. اللمونه بتعمل ايه فى المجتمع بقه هل هى بتقضى على الحاجات الوحشة! والا هى عايشة فى وسط الحاجات الوحشة ومش عارفة تقضى عليها, وإلا هى بقت زى الحاجات الوحشة فامبقتش مفعولها موجود أصلاً وبالاسم بس لمونه, والا هى بتحاول تزرع حاجة فى عيشتها علشان شجرتها لما تكتر وشجر اللمون بيدى بغزاره وكله عطاء حتى بشوكه,  اذا هو جذوره كويسه وفى أرض صالحه..

اللمونه فين فى كل الكلام ده;  اللمونه فى المجتمع موجوده في كل حاجة, فمجتمعك الصغير ومجتمعك الكبير, فى علاقاتك فى بيتك في حياتك فى اجتماعياتك فى كل حركة انت بتعملها وعايشها.. 

أنا وأنت عايشين على أرض إحنا اللى تاعبينها,  تعبناها من قلة ثقافتنا, تعبناها من تغير اصولنا وعاداتنا وتقاليدنا, تعبناها من قلة نضافتنا, تعبناها من قلة احترامنا لبعض, تعبناها من قله احترامنا لأرضنا ونظامنا, تعبناها من قلة ضميرنا, تعبناها من قلة عطاءنا, تعبناها من كتر التعقيدات اللى بنعملها, تعبناها من قلة انتاجنا, تعبناها بأننا لغينا وعِمينا عن حبنا لأرضنا, وبقى يتملكنا القوة والسلطة والطمع والهيمنه..                                                                                       اللمونه جت نصين, بقت نص سلبية ونص ايجابية, ومابقتش قادرة تفرق ما بين الاتنين, لأن ايجابيتها ساعات مرارة سلبيتها.. بيخفيه و بياخد قوته, بس اللمونه لمونه هى فى الآخر لمونه, حتبقى بقوتها انها تقدر تعصر على الضغوط اللى موجوده وتقلل حجمها على اللى حواليها وتهون عليه, وتحاول تعيش علشان أنا وإنت لومنا على بعض ومن بعض مالوش دعوه, وبقت شخصيه ومصلحه جوه حياه مليان ضغوط وفروق وتغيرات جذريه مش ممكن كان ممكن حد يتصورها بتغير زمن من زمن تشبيه البشر باللمون..                                                                           ولأن كل واحد هو لمونه, فبدل ما نقول لمونه فى بلد قرفانه, حانقول بلد بتحاول, ولمونها يهون عليها ويرجع لها بهجتها ونضارتها ويشيل مرارتها.. لانه هو قوتها من شجرتها!

مصرية 

25 August 2019

شاهد أيضاً

لبنان حالة فوق العادة .. بقلم : محمد فؤاد زيد الكيلاني

بعد فشل الربيع العربي في سوريا والانتصار السوري على الإرهاب والإرهابيين وإفشال صفقة القرن، حاول ...