اليوم الأربعاء 11 ديسمبر 2019 - 5:14 مساءً
الرئيسية / مقالات / من خواطرى : موتة حياه .. بقلم : مـــنى حــسـن

من خواطرى : موتة حياه .. بقلم : مـــنى حــسـن

ايه هو الموت .. الموت معروف بانك بتسافر لرحلتك الأبدية!!

فى إعتقادى ان الموت ده له أشكال كتير كمان فى الحياه, البنى آدم بيموت وهو عايش, النوم موت, هو موته صغرى,  لكن في انواع تانيه من الموت فى حياته بتكون فى شكل مواضيع كتيره ممكن انتهاءها يكون بالنسبة له موت ..

أى موضوع بينتهى بيكون ده نوع من أنواع الموت, خصوصا لو فيه روح .. الإنفصال بين اتنين ده نوع من أنواع الموت, بمعنى موت حياة,  إنتهاء علاقة من أى أنواع العلاقات سواء علاقة عاطفية او علاقة شغل او علاقة فيها اتفاق, ده نوع من انواع الموت ..

كلمة موت دى كلمة قوية جداً, الناس بتخاف منها وكتير قلبهم بيتقبض من الكلمة, لأن الموت عالم غير معلوم وعالم مش مفهوم هو ايه اللى فيه, ولكن الموت هو بداية لحاجة تانية, احيانا بتكون البداية بعد وقت لأن بيتبع حالة الموت حالة من السكون او الإنتظار سواء لصفاء النفس, انتظار لاعاده ترتيب, انتظار لفعل, انتظار لحاجة, انتظار لمراجعة أحداث لخروج من أحداث موقف معين, هى فيها من المركبات العديده.

إعتبارية الموت او الفكر بتاعها أن تقول كلمة موت وإنت عايش وعلى قيد الحياة, ده مش كلمة دارجة  ولكن فيه بنى آدمين بتموت وهى عايشة, مابتقباش عارف هى ماتت ليه, وساعات كتير حتى لو كنت عارف هى ماتت ليه مبتبقاش عارف تعمل لها ايه او هى تعمل لنفسها ايه لأنها ماتت خلاص مابقاش عندها نوع من أنواع الأمل والفكر والاحساس بإن حاجة تفرق, كل حاجة بتبقى خدت موضع التكالية مش اليأس, لكن احيانا يأس ولأن كل بنى آدم بيختلف وكل شخصية بتختلف فاستقباله مختلف…

خسارة الحياة موت, خسارة الثروة موت, خسارة القريب موت, خسارة الأهل موت,  خسارة الحياة الزوجية موت, خساره الصاحب موت, خساره النفس موت…

الانسان فى العادى بيعيش الأمل ولكن خيبة الامل هى موت احساس وكيان..

من أصعب الموت كمثل, وهو مثل متكرر الزواج والعلاقة بين الراجل والست … بيعيش الراجل فى حياته الخارجية ومجرد بس انه بيتعايش مع حياته الأسرية وبتنتهى هذه العلاقة بتباعدهم, وتموت العلاقة الرومانسية بينه وبين مراته, علما بأنها اساس الحياة.. فى كتير من الأحيان بتموت العلاقة بينهم ويقبلوا الأمر الواقع فى الحياة وتبقى الحياة مكمله,  بس لأن الست هى الل قررت تكمل الحياة لأى ظرف ان كان, ولكنها بتعانى من الموت, الموت العاطفى, والموت في حقوقها والموت في العيشة, وبتنقلب لكائن لا يمارس اى نوع من انواع الحياة, غير انه بيتعايش مع الحياة وبس, وبتتلغى ادمية المرأة!

المشكلة فى الموضوع ان ده صورة من الصور اللى موجوده فى الحياة وملهاش حل, ولانه نابع من ثقافة المجتمع اللى بتنشأ فيه المرأة وعدم القدرة على اتخاذ القرار لإنهاء الموت لبداية جديدة …. 

وايضاً من القصص المتكرره عندما يمر الانسان بكارثة او بصدمة او بتغيير حياة, سواء فشل, سواء خسارة فلوس, او سواء خسارة اصحاب, او ركود فى الشغل, حاجات كلها بتأثر على نفسية البنى آدم, في الحالة دى بيدخل البنى آدم فى دور من الاكتئاب واحيانا اختيار ناس للموت, بأنه بيرفض الحياة ويتعايش مع الحظة اللى بيعيشها فقط,  اللحظة بلحظة لأنه معندوش بكره, ويِأس إنه يدور على بكره او يفكر فيه بقى مافيش حلم, ممكن امكانيات, ممكن ظروف, ممكن احساس, ممكن اى حاجة بتوصله لدرجة اليأس الفظيعه دى او حتى تحمل اى عبء او اى نوع من المسؤليه, وده بيكون اكتئاب خصوصا لما يموت كمان كل حاجه حواليه لانه بيهرب منها, وفى نفس الوقت بيكون نوع من انواع الموت انه بينهى حياة هو عايشها, وبيبقى فى وضع الإنتظار يا بيخش في مرحلة مواجهة الحياة بايجابية وده محتاج شخص مثابر,  يا بياخدها بسلبية ويفضل فى الانتظار ويرفض كل حاجة كويسة ممكن تجيلوه لأن بيبقى حاسس انه قليل الحيله وزهق من الحمل والمعافره, ماعندوش حاجة, وده غلط الاحساس بالموت وأنا عايش ده احساس فظيع.. الموت هو خلاص موت ولكن الموت المفروض يكون صحوته وإنت لسه بتتنفس تكون بداية, وتكون نوع من أنواع انك تفوق, انك اتعلمت من درس قاسى جدا وتجربه قاسية او ايا كان نوع التجربة ان هى ممكن تخليك تبص لنفسك وتراجع نفسك علشان تقدر تبتدى تانى بايجابية,

 الحب بيدى أمل, والشمس لما بتطلع الصبح بتدى امل, الضحكة بتدى امل, حركتك بتدى امل, النفس اللى ربنا حطه فى روحك بيدى امل, قلبك بيدق ده امل, علشان تحارب موته الحياة لازم تقاوم, ولازم تحط جواك ان بكره فيه امل من إللى بيمد ايده ليك, وفى أمل للى بيضحك في وشك, وفى امل للى بيلمس قلبك ….

كل ده رزق وكل ده بيدى فرصة تانية للحياة, عيش حياتك لأن وقتك لسه مجاش,  عيش حياتك طول ما انت رجلك لسه بتلمس الأرض, عيش حياتك طول ما انت صدرك لسه بياخد نفس, الرزق من العاطى الرزاق, فعيش حياتك طول ما فيه روح جواك لأنك لسه مسافرتش رحلتك الأبدية..

مصرية 

17 September 2019

شاهد أيضاً

من خواطرى : سمـا طير طليق .. بقلم : منــى حســن

يا طير يا طاير فى السما أوعى تفتكر نفسك حر طليق, صحيح حر الحركة لكن ...