الرئيسية / مقالات / من خواطرى : سمـا طير طليق .. بقلم : منــى حســن

من خواطرى : سمـا طير طليق .. بقلم : منــى حســن

يا طير يا طاير فى السما أوعى تفتكر نفسك حر طليق, صحيح حر الحركة لكن سماك, شجرتك هى سجنك, تطير وتهاجر وتسافر وتروح تعمل عش وتبنيه ما بين الأغصان, وتتنقل من هنا لهنا ومن شجرة لشجرة ومن سور لسور وانت حر طليق ولكن حريتك لا تعدى فوق السما ولا بتنزل سابع ارض..

 البنى آدم عامل زى الطير, بيعيش حياته بيختار عيشته وهو محكوم بمجتمعه حتى لو هاجر البلاد, هو حر ولكن الحرية ليها قواعد ومسؤولية,  لأن الحرية مسؤولية وليست حرية وخلاص كده بإن البنى آدم بيبقى متساب وسايب نفسه, زمان علمونا لو عايز تعتمد على نفسك وتاخد قرارات وتعيش بطريقتك حتبقى انت مسؤول قدام نفسك الاول عن طريقة اتخاذ القرار ده, فبالتالى حتبقى مسؤول أكتر من ان حد تانى يكون مسؤول عنك,  فبتلاقى ان الحرية بقت حرية مقيده, مش مشروطة ولكنها الحرية مسؤولية, الحرية ليها قوانين مش حاجة عشوائية انا حر أعمل اللى انا عايزه, كلمة دارجة بقالها فتره دلوقتى, ايوه انت حر تعمل اللى انت عايزه بس فى اطارات, وليها ردود افعال وليها محاسبة نمره واحد قدام نفسك, وليها معايير وحاجات كتيره. الحرية احترام الذات, ومراجعه نفسك والالتزام, وبتوصل بقى للضمير وللمسؤولية الخ.. بس من أحلى حاجة زى الطير فى السما احساس انك انت بتتعامل بطبيعية فى حياتك في مجتمعك في وسط ناسك, لأن لما بتقيد نفسك بتبقى كده قيدت حريتك مع نفسك,  رسمت لنفسك قالب مش انت, او هو انت بس بقت حريتك مكتومه, بــــ لأ مقدرش أعمل ده, لأحاعمل ده, لأ مش حاينفع ده, لأ ده الناس حاتقول كذا, لأ مش عارفة ايه, فكده مابقتش بنى آدم طبيعى, الحرية هى حرية فكر, حرية نفس, حرية روح, حرية احساس وحركه بالحرية وكل واحده من دول ليها قانون, والحرية مش من المفروض رد الفعل بتاعها ان انا أذى اللى قدامى او أقل احترامه او اهينه او افرض عليه حاجة, لأن زى ما أنا حره فى فكرى وطريقتى وعيشتى واسلوبى بيكون هو حر كمان, انما دايما بيبقى فى نوع من التوافق والعرف فى العيشه, ونظام والتزام, وان هى في الآخر انت ازاى بتوظفها بطريقة عيشتك وانها متكونش حاجة تخنق تكون حياه فيها انسيابية عيشة حره طليقة  

الطير بيسافر من شرق لغرب ويهاجر علشان العوامل الطبيعة, وبيكون منظم جدا بمواعيده وبسربه وبطريقة طيرانه, مع انه حر لكن عنده التزام,  انما البنى آدم ابتدى يشوف ان الحرية كسر التزام, وده غلط لأن الحرية هى التزام, ليها احترامها وليها اسلوب تعامل وليها فكر وليها محاسبة محاسبة,  الطير لما بيبتدى يبنى بيته وعشه بيختار المكان اللى يناسبه بيبتدى يبنيه, بيبتدى دورة حياته مع عصافيره تطلع نفس الحكاية, البنى آدم لما بيبتدى دورته فى حياته بيبقى ملتزم بيها وبيعيش ويكمل حياته, مش معنى ده ان حريته اتقيدت بالتزامه بعيشته وبأهله, لأن دى من الواجبات لكن هو فى حياته العادية حر فى تصرفاته حر في حركته حر فى لبسه وكلامه وعيشته وفكره,  بس في الآخر مايدلوش الحق انه يقل او يكسر احترام الاحترام مهم أوى أوى فى دنيتنا الحالية مش معنى ان أنا حر أقول اللى أنا عايزه أو اعمل اللى أنا عايزه وانى أكون خارج عن اصول الكلام والأفعال .. 

الزمن ده الناس فاهمة الحرية غلط, وابتدت تفتح حياتها وفاهمة ان ده نوع من الحرية,  وغطاء الستر مكشوف, ده غير الكلام وطريقة التعامل وقلة احترام واستعمال ألفاظ وحاجات كتيره اوى, حتى النشأ الصغير بقى كده,  الحياة بقت مكشوفه بشكل مبالغ فيه, كل بنى آدم بقى بيحاول يبين حاجات ماينفعش تطلع ما بين اربع حيطان, وفاكر ان دى الحرية وعادى, نسيوا ان فيه حاجات ماينفعش تتعمل,  الطير مابيعملهاش مع انه حر طليق, لكن لسه عنده التزام … خساره 

مصرية

25 October 2019

شاهد أيضاً

من خـواطرى : رومانسيات ..  بقلم : مـنى حسن

 نفسي فى حاجات كتير, بحب اشوف البحر معاك, بحب افتح عيونى الاقيك معايا, بحب حبك ...

اترك تعليقاً

لن يتم نشر عنوان بريدك الإلكتروني. الحقول الإلزامية مشار إليها بـ *

هذا الموقع يستخدم Akismet للحدّ من التعليقات المزعجة والغير مرغوبة. تعرّف على كيفية معالجة بيانات تعليقك.