الرئيسية / مقالات / من خواطرى : الفرق يوم .. بقلم : منى حسن

من خواطرى : الفرق يوم .. بقلم : منى حسن

 

دايما السنه الجديده بدايتها بيكون لسه معاها فى ديولها احداث سنه عدت من حلوها ومرها واوجاعها وبفراق ناس  عزاز على قلبك وناس راحت كانت فرقت فى حياتك واستقبلت ناس تانيه غيرهم كانهم عشره عمرك, واللى اصلا كان عشره عمرك بان صدى السنين عليهم وفى منهم لاغيتهم منها

السنه ايامها كتير وكل يوم حكاياته كتير, ده غير حياتك وعيشتك وعلاقاتك والتزاماتك وواجباتك ..

يوم السنه بقى بيجرى رمح, وتلاقى اسبوعك اخره شهر ويجى اللى بعده ويكر لاخر يوم فى السنه مع احداثها الزحمه وضغوطها فجاءه بتلاقى كلها عباره عن لحظه بتفرق فى لضمه لحظه لسنه جديده

بتحاول تتمنى ايامها احسن من ايام اللى فاتت مع انها كلها ايام ماشيه وارا بعضها والسنين مجرد ارقام بتعد 

السنين هى عمر وزمن احساسه انت اللى بتقيمه ومعظم الاحوال انت اللى بتكتبه  وتختار الابواب اللى بتعيشها ..

اختياراتك فى الحياه تكون على حسب شخصيتك وخبراتك واقدار الحياه كمان لها دور, ومع قرب السنه الجديده بتبتدى تشوف عاوز ايه من ايامها  وحاتقدر على فعل ايه كانها بدايه جديده

وبتبدى وتعدى الايام وتوه معاها اللى كنت بتتمناه لان الوقت يسرقك والحياه هى الحياه

الوقت هو العامل الاساسي, وللاسف بقى بيعدى بسرعه  والطلبات كتير لان رتم الحياه بقى سريع جدا, وانت متطلباتك بتزيد لمواكبه العيشه ومافيش فرمله

المشكله ان الانسان ضغطت نفسه من غير اى داعى وملى حياته أعباء على الفاضى, ده غير الشكليات ومع كتر الماركات, حياته بقت عباره عن فاترينه متحركه, وشغل نفسه ازاى يملاها لحد ماورط نفسه وفى الاخر يلاقى حمله تقل..

كل واحد عنده حلم, او طلب او مشكله اوامنيه نفسه فيها يتمناها مع بدايه السنه على امل انها تتحقق

بابانويل حلم الاطفال والكبار, اسبوعين طاير انه حايجى بعربيته ومخلته ويحل كل المشاكل 

والصلوات والدعوات تزيد مع معايدات بدايه السنه, منسي ان الانسان هو اللى لازم يتغير ويصلح من نفسه علشان حياته تتعدل او امنياته تتحقق

الايام والسنه مالهومش ذنب ولا دخل لانهم مش اكتر من وقت وساعات ودقايق

غربل زوادتك اللى لملمتها طول مانت ماشى, وحاول تبسٌط حياتك لان هى فعلا الحياه بسيطه, وايامها انت مُخرجها  فعشها وانت سعيد لان اخر اليوم هو بدايته ويكمل بفرق آخر يوم فى السنه ثوانيه هو ليوم سنه جديده!!

جميل ان الواحد يكون عنده امل, واحلى لو حاول يحققه, بس الاجمل انه يقدر الوقت اللى بيعيشه لان ده مابيتعوضش.

احلى الاوقات بدايات السنه, كلها وعود وامنيات وحب وروحانيات وطاقه ايجابيه تعود علينا بالخير والسعاده  والصحه والامن .. آمين

مصريه

منى حسن

شاهد أيضاً

إسرائيل تبحث عن طوق النجاة .. بقلم : محمد فؤاد زيد الكيلاني

الأحداث الدائرة في الوطن العربي خطيرة جداً وتهدد بحرب عالمية ثالثة، وهذه الحرب إن حصلت ...