الرئيسية / مقالات / من خواطرى : الفلك له اسرار .. بقلم : منى حسن

من خواطرى : الفلك له اسرار .. بقلم : منى حسن

الكون والفلك له اسرار بيأثر على حياتنا وتصرفاتنا, وتحركاتهم بينعكس على طريقة عيشتنا واسلوب حياتنا …

وان حركة الكواكب مع النجوم في مدارهم بيأثر جامد على نفسية البني آدم, في ناس كتيرة متعرفش إن الفلك له دور في حياتنا,  زي بالظبط ما تقوم من النوم تلاقي الجو حلو, فانفسيتك بتنشرح وتبقى مبسوط .. ويوم تاني بيبقى مطره وعواصف بتبقى نفسياً متأثر لأن الجو مش مساعدك فبالتالي بينعكس عليك, ده غير حساباته للزراعه والمحاصيل والتنبؤات الجويه الخ..

دى حكايتك مع الفلك, بس ده إحساس مستتر مش واضح مش باين لك مباشر,  بيبان في تصرفاتك وفي إنفعالاتك فمبتبقاش مدرك أنا مالي النهاردة أنا ليه مزاجى النهاردة مش كويس أو ليه أنا النهاردة الأمور مش ماشية كويس أو ليه الحياة النهاردة ملعبكة مع إن اليوم هو هو …. الكواكب ليها دور في المواضيع دى لما بتقرب مع بعض أو تتداخل مع بعض مع مدارتها,  ودي كلها كمان لها علاقة بيوم ما إتولدت والساعة والميعاد يعني صبح أو ضهر أو ليل …..

الكلام ده مش كلام كده وخلاص, ده كلام مدروس وفي علم اسمه علم الفلك والأبراج والتنجيم,  والاتنين دول لهم علاقة مباشرة في حياة البني آدم ودي ثقافة وعلم مش موجودة فى مجتمعنا… إحنا اكتر عندنا معروف الأبراج, إيه برجك وبيعمل إيه.. وكتير الصبح بتبتدى يومه بقرايه برجه..

إنما بجد بجد ورا الكلام ده في عالم تاني خالص بحسابات وتعاريف كتيرة جدا ومدارات ومجارات مش ملمين بيها في حياتنا…. وان يوم زى السنة القبطية واليهودية والهجرية إتجمعوا في يوم واحد ده حدث,  وإن كان فيه استغراب ولكن ناس كتيرة كانت مبسوطة باليوم ده أو كانت بتكتب عنه, علما ممكن مش مدركه حصل ازاى… وإن ده حدث فلكي .. وإحنا عاصرناه, وحايحصل في حياة أجيال تانية بعدين, زى ظواهر تانيه…

يوم واحد وده من حركة الفلك فى مداره, الكواكب حركتها معروفه وده مدروس حتى من أيام  الفراعنه كان حياتهم كلها ماشية بالكواكب ودوائر الكون ووقتهم محسوب بالنجوم والكواكب..

هو صحيح علم الغيب مهواش بتاعنا ولا فى ايدينا ولكن فيه حاجات معروفه بصفة دائما واخرى إحتمالية, بتبقى إحتمالاتها المفروض كبيرة ولكن ممكن الظروف الدنيوية تغيرها وخصوصا بالنسبه للابراج …

عندنا استعمالات الفلك فى حكاية كذب المنجمون هنا يعني إحتمالية تنبؤاتهم بتكون على إحتمالية المفروض وفي ظروف بتغير المفروض… أما لو كلامنا على علم الغيب فإحنا مالناش فيه لأن لو لنا فيه كنا حانعرف قدرنا ايه.. وده مش وارد ولكن إحنا عندنا فكر, عندنا إحتمالات زي بالظبط البني آدم بيمر بتجارب معينه وبعد شوية بيقى عنده احساس واستشعار باللي حايحصل, أو بيبقى شايف حاجة ويقدرها ويقيمها ويقول أنا حأعمل دي أو مش حأعمل دي, لأنه خلاص بقى عنده علم بيها وبصيره,  ممكن يبقى قراره غلط وممكن يبقى قراره صح, وده يتوقف على مدى خبرته وبعد نظره..

علم الفلك نفس القصة فى تاثيره, إنت عندك مصداقيات معينه أو عندك نظره معينه لحاجات مستقبلية ولكن الظروف الدنيوية ممكن تؤثر عليها أو تعدل عليها… كمان نفسية البني آدم وشخصيته بتتأثر كتير بالموضوع ده,  يعني ميجيش بني آدم مثلاً عصبي أو خلفه ضيق أو ظروفه تكون كده ويدخل في موضوع ويكون محسوب له إن المواضيع دي ماشية في هذا الإتجاه وفجأه طريقته و قراره يقلب خالص موضوع ما كان مكتوب, ويفتح باب جديد يدخل فيه ميكونش مكتوب أو ميكونش هو المفترض يكون فيه, علشان كده ساعات كتيره في ناس كان زمن أجدادنا يقولك أصله دخل عتبة مش بتاعته,  لأن أحيانا البني آدم بيدخل في أشياء هي مش مكتوبه له, إنما في الدنيا في العقل اللي ميزنا بيه ربنا ساعات بيدخلنا في ظروف مش يإيدينا ولكن باختيارنا… علشان كده دايما يقولك إستنى علي الموضوع شويه متاخدش قرارك فيه بسرعه خصوصا فى مواضيع مهمة أو مصيرية, ولكن البني آدمين مش زى بعض فى ناس بتعمل كده وفى ناس مبتعملش كده ….

الفلك في حياتنا جزء من حياتنا مش حاجة هامشية لأن إنت بتعيش به وبتتولد به ومن ضمن الحياه  في مسيرة حياتك, زي ما في بالظبط علم للإنسان وازاي في دراسات وأفكار وفى علم النفس, فالفلك بيدور في حياة البني آدم,  وكل بني آدم مختلف عن التاني وكل بني آدم الفلك بيأثر عليه بطريقة مختلفة.. الفلك في حركته ولما بيدور في الكون مع البقية فى المدار,  كل ساعه وكل وقت له تأثير, وحركة الكواكب نفسها لها تأثير في عالم تانى, وتاثيرات الفلك ده بتتأثر على بعض, يعني لما المشترى يدخل في الثور أو الجدي أو العذراء كل دول على حده لهم تأثير مباشر في حياة البني آدم أو بيغير او يضيف حاجات كتيرة في حياته في طرق وأفكار وتسهيلات وتعقيدات وفي نفسيته,  الفلك لازم يكون بدراية كامله هو بيشير لأيه, وده مثال بسيط لكوكب المشترى: بإن له تأثير معين في مداره لأنه من أقوى الكواكب في علم الفلك.. وغيره فينوس الناس كلها تعرفه إنه يمثل الرومانسيه والحب والجمال وهو له تأثير مباشر على حسب ما بيكون تداخلاته مع مين كوكب بيمر عليه, التأثيرات كتيره فبالتالي مينفعش القراءات تكون سطحية لان قرايتها لها وقت وحسابات وابعاد ….

كواكبنا التسعة: متغيرة في المكان ومتغير ليلها ونهارها حسب حجم وسرعة الكوكب في فلكه وزمن ظهور نجمته, كما أن سنته متغيرة حسب سرعة دورانه حول نجمته الأم وبعده عنها، لان سنين الكواكب متغيرة الأزمان والفصول..  

دلوقتي بقى فيه وسيله هي مواقع البحث للبحث والمعرفه بدل ما تدي ملحوظة أو هجوم وتنتقد.. إبتدي أقرا وإعرف, لو لقيت إن ده ما لوش تأثير إيجابي او معنى, إعترض أو قول إيه لازمته , وايجابيته هى معلومات عامه..

البني آدم يحاول بتوصيل معلومه ايجابية بلاش تدي طاقة سلبية حواليك علشان الدنيا مش محتاجة طاقة سلبية, إحنا عندنا ضغوط كتيرة أوي في الحياة العادية, إنما البني آدم على الأقل يساعد إنه يدي بهجة وإيجابيات علشان يدفع, ويحفز بعضه إنه يعمل حاجة كويسة وياريت نفكر لبعض مش ضد بعض..

مصرية

14 September 2018

شاهد أيضاً

نشر الحروب.. البرنامج الصاروخي وإرهاب النظام الإيراني .. بقلم: المحامي عبد المجيد محمد

الحرسي حسين سلامي نائب القائد العام لقوات الحرس وخلال حديث له أكد على تدخلات النظام ...