اليوم الأربعاء 23 أكتوبر 2019 - 10:00 صباحًا
الرئيسية / مقالات / من خـواطرى : رومانسيات ..  بقلم : مـنى حسن

من خـواطرى : رومانسيات ..  بقلم : مـنى حسن

 نفسي فى حاجات كتير, بحب اشوف البحر معاك, بحب افتح عيونى الاقيك معايا, بحب حبك وامانك, بحب لهفتك وانت مستنينى, بحب انى بكبر معاك..

عارفه وانا مغمضه انك بتحس بيه, علشان بتقول الكلمه اللى عاوزه اقولها, بتشوف الحاجه بعينى, بتناديلى وبناديلك, بنقرا نفس الكلام, بتغنى نفس الاغنيه, بتحب نفس المكان..

ياترى الحاجات الجميله دى لسه موجوده!  ولا دى فى نفس البنى ادم من رومانسيات هى مجرد ذكريات من زمن كان فيه احاسيس وحب و تأمل وشوق ولهفه, كان القلب بيدق والنفس يبقى سريع مجرد ان بيورد عليك طيف حبيبك..

من اقوى الروابط فى الحب لما الواحد بيلاقى توأم روحه.. توأم روحك معاه كأنك انت بتكلم نفسك, توأم روحك معاه مابتبذلش اى مجهود لا فى شرح ولا فى كلام ولا افعال, انت مفهوم وهو مفهوم ومش محتاج حتى تبص لا بنظره  ولاهمسه..

لو لاقيت توام روحك تبقى محظوظ, لانه نادر جدا انك تلاقيه, ومن اصعب الاحساس لما بيحصل فراق لتوأم روحك, لان كأن بيتقلع قلبك من جسمك, وعقلك بيقف لان ارتباطكم ببعض كانكم واحد والوجع صعب فى الفراق..

الحب انواع كتيره اوى, والرومانسيه لها اشكالها بانك تظهر حبك, الرومانسيه هو جو دافى وفعل وبيدى الحب بهجه وترابط وود وعمق, الحب من غير رومانسيه يبقى بارد مالوش معنى, زى الاكله من غير تحابيش ولا ملح ولا فلفل ولا شطه, الحب لازم يبقى فيه حاجات كتير ليكون حب كامل, ومن اقوى انواع الحب اللى لاقى نصه التانى, اللى ملاه واللى دخل فى كل حته جواه مبقاش عنده فراغ, بيمشى وهو عايش بيه, بيفكر بيه, بيعيش معاه..

الكلام ده موجود فى القصص والكتب والحكايات والافلام الرومانسيه.. وموجود فى الحقيقه كمان,  ولكن نسبه وجوده ضئيله جدا, وقليل من الناس اللى يفهموا يعنى ايه الاقى توأم روحى او يقدروا, او يعرفوه يتعاملوه معاه من غير ما يقتلوه التلاقى ده, لان فى ناس من الجهل بتخاف, ولما بترجمها انه واضح ومقرى لنصه التانى بيشوفه انه تعدى على حياته, ولكن فى ناس يبقى عندها درايه المعنى والاحساس, الناس اللى بتعرف معنى وجود توام روحى فى حياتى يعتبروا من اسعد الناس ومن الناس القليله جدا لان بتبقى كده حياتهم اكتملت..

مهم جدا ان البنى ادم يبقى عنده قناعه, بانه يكون مدرك ان الحياه مليانه مصاعب وظروف, ولكن احساس الارتباط بوجود توام روحك بيبقى اقوى انه بيتغلب على كل السلبيات وان ده مالوش دعوه, لانه ده هو الحياه, هو الامان ومواجهه الحياه بيه بتهون,  وزى مابيقولوا ايد واحده مابتصقفش, هما الاتنين بيبقوا ايد واحده, هما الاتنين بيبقوا اقويا ببعض, هما الاتنين بياخدوا ايجابياتهم من بعض, يياخدوا الامل, ياخدوا الحب, بياخدوا النجاح, بياخدوا الحلم, ماحدش بيفكر يجى على التانى, الانانيه بتتلغى لان التفكير بيبقى لواحد وهما الاتنين واحد..

مش عارفه ايه اللى خلا اتكلم عن توأم الروح,  لان اعتقد فى وسط الحياه الصعبه دى مش سهل انك تلاقى المثل ده, ولكن اذا صادف وحد لاقى توام روحه حايكون محظوظ, وحايكون من غلطات حياته فى وسط الصعاب دى انه مايتمسكش بيه, لانه بيكون له طوق نجاه فى الحياه, بيكون هو بهجه الحياه, بيكون هو الحب.. واحنا فى زمن ناقص الحب.

 ياريت يتواجد وياريت نبقى عليه..

مصريه

30,Sept,2019

شاهد أيضاً

مـن خواطرى : نداهه .. حته حديد ..  بـقلم : مــنى حـــــسن

البنى ادم كان زمان حياته كلها واسراره يا جوه نفسه يا مع صاحب, عمره دلوقتي ...